चौपाई
सुनहु तात यह अकथ कहानी। समुझत बनइ न जाइ बखानी।।
ईस्वर अंस जीव अबिनासी। चेतन अमल सहज सुख रासी।।
सो मायाबस भयउ गोसाईं। बँध्यो कीर मरकट की नाई।।
जड़ चेतनहि ग्रंथि परि गई। जदपि मृषा छूटत कठिनई।।
तब ते जीव भयउ संसारी। छूट न ग्रंथि न होइ सुखारी।।
श्रुति पुरान बहु कहेउ उपाई। छूट न अधिक अधिक अरुझाई।।
जीव हृदयँ तम मोह बिसेषी। ग्रंथि छूट किमि परइ न देखी।।
अस संजोग ईस जब करई। तबहुँ कदाचित सो निरुअरई।।
सात्त्विक श्रद्धा धेनु सुहाई। जौं हरि कृपाँ हृदयँ बस आई।।
जप तप ब्रत जम नियम अपारा। जे श्रुति कह सुभ धर्म अचारा।।
तेइ तृन हरित चरै जब गाई। भाव बच्छ सिसु पाइ पेन्हाई।।
नोइ निबृत्ति पात्र बिस्वासा। निर्मल मन अहीर निज दासा।।
परम धर्ममय पय दुहि भाई। अवटै अनल अकाम बनाई।।
तोष मरुत तब छमाँ जुड़ावै। धृति सम जावनु देइ जमावै।।
मुदिताँ मथैं बिचार मथानी। दम अधार रजु सत्य सुबानी।।
तब मथि काढ़ि लेइ नवनीता। बिमल बिराग सुभग सुपुनीता।।
दोहा/सोरठा
जोग अगिनि करि प्रगट तब कर्म सुभासुभ लाइ।
बुद्धि सिरावैं ग्यान घृत ममता मल जरि जाइ।।117(क)।।
तब बिग्यानरूपिनि बुद्धि बिसद घृत पाइ।
चित्त दिआ भरि धरै दृढ़ समता दिअटि बनाइ।।117(ख)।।
तीनि अवस्था तीनि गुन तेहि कपास तें काढ़ि।
तूल तुरीय सँवारि पुनि बाती करै सुगाढ़ि।।117(ग)।।
एहि बिधि लेसै दीप तेज रासि बिग्यानमय।।
जातहिं जासु समीप जरहिं मदादिक सलभ सब।।117(घ)।।
चौपाई
सोहमस्मि इति बृत्ति अखंडा। दीप सिखा सोइ परम प्रचंडा।।
आतम अनुभव सुख सुप्रकासा। तब भव मूल भेद भ्रम नासा।।
प्रबल अबिद्या कर परिवारा। मोह आदि तम मिटइ अपारा।।
तब सोइ बुद्धि पाइ उँजिआरा। उर गृहँ बैठि ग्रंथि निरुआरा।।
छोरन ग्रंथि पाव जौं सोई। तब यह जीव कृतारथ होई।।
छोरत ग्रंथि जानि खगराया। बिघ्न अनेक करइ तब माया।।
रिद्धि सिद्धि प्रेरइ बहु भाई। बुद्धहि लोभ दिखावहिं आई।।
कल बल छल करि जाहिं समीपा। अंचल बात बुझावहिं दीपा।।
होइ बुद्धि जौं परम सयानी। तिन्ह तन चितव न अनहित जानी।।
जौं तेहि बिघ्न बुद्धि नहिं बाधी। तौ बहोरि सुर करहिं उपाधी।।
इंद्रीं द्वार झरोखा नाना। तहँ तहँ सुर बैठे करि थाना।।
आवत देखहिं बिषय बयारी। ते हठि देही कपाट उघारी।।
जब सो प्रभंजन उर गृहँ जाई। तबहिं दीप बिग्यान बुझाई।।
ग्रंथि न छूटि मिटा सो प्रकासा। बुद्धि बिकल भइ बिषय बतासा।।
इंद्रिन्ह सुरन्ह न ग्यान सोहाई। बिषय भोग पर प्रीति सदाई।।
बिषय समीर बुद्धि कृत भोरी। तेहि बिधि दीप को बार बहोरी।।
चौपाई
sunahu tāta yaha akatha kahānī. samujhata banai na jāi bakhānī..
īsvara aṃsa jīva abināsī. cētana amala sahaja sukha rāsī..
sō māyābasa bhayau gōsāīṃ. baomdhyō kīra marakaṭa kī nāī..
jaḍa cētanahi graṃthi pari gaī. jadapi mṛṣā chūṭata kaṭhinaī..
taba tē jīva bhayau saṃsārī. chūṭa na graṃthi na hōi sukhārī..
śruti purāna bahu kahēu upāī. chūṭa na adhika adhika arujhāī..
jīva hṛdayaom tama mōha bisēṣī. graṃthi chūṭa kimi parai na dēkhī..
asa saṃjōga īsa jaba karaī. tabahuom kadācita sō niruaraī..
sāttvika śraddhā dhēnu suhāī. jauṃ hari kṛpāom hṛdayaom basa āī..
japa tapa brata jama niyama apārā. jē śruti kaha subha dharma acārā..
tēi tṛna harita carai jaba gāī. bhāva baccha sisu pāi pēnhāī..
nōi nibṛtti pātra bisvāsā. nirmala mana ahīra nija dāsā..
parama dharmamaya paya duhi bhāī. avaṭai anala akāma banāī..
tōṣa maruta taba chamāom juḍaāvai. dhṛti sama jāvanu dēi jamāvai..
muditāom mathaiṃ bicāra mathānī. dama adhāra raju satya subānī..
taba mathi kāḍhai lēi navanītā. bimala birāga subhaga supunītā..
दोहा/सोरठा
jōga agini kari pragaṭa taba karma subhāsubha lāi.
buddhi sirāvaiṃ gyāna ghṛta mamatā mala jari jāi..117ka..
taba bigyānarūpini buddhi bisada ghṛta pāi.
citta diā bhari dharai dṛḍha samatā diaṭi banāi..117kha..
tīni avasthā tīni guna tēhi kapāsa tēṃ kāḍhai.
tūla turīya saomvāri puni bātī karai sugāḍhai..117ga..
ēhi bidhi lēsai dīpa tēja rāsi bigyānamaya..
jātahiṃ jāsu samīpa jarahiṃ madādika salabha saba..117gha..
चौपाई
sōhamasmi iti bṛtti akhaṃḍā. dīpa sikhā sōi parama pracaṃḍā..
ātama anubhava sukha suprakāsā. taba bhava mūla bhēda bhrama nāsā..
prabala abidyā kara parivārā. mōha ādi tama miṭai apārā..
taba sōi buddhi pāi uomjiārā. ura gṛhaom baiṭhi graṃthi niruārā..
chōrana graṃthi pāva jauṃ sōī. taba yaha jīva kṛtāratha hōī..
chōrata graṃthi jāni khagarāyā. bighna anēka karai taba māyā..
riddhi siddhi prērai bahu bhāī. buddhahi lōbha dikhāvahiṃ āī..
kala bala chala kari jāhiṃ samīpā. aṃcala bāta bujhāvahiṃ dīpā..
hōi buddhi jauṃ parama sayānī. tinha tana citava na anahita jānī..
jauṃ tēhi bighna buddhi nahiṃ bādhī. tau bahōri sura karahiṃ upādhī..
iṃdrīṃ dvāra jharōkhā nānā. tahaom tahaom sura baiṭhē kari thānā..
āvata dēkhahiṃ biṣaya bayārī. tē haṭhi dēhī kapāṭa ughārī..
jaba sō prabhaṃjana ura gṛhaom jāī. tabahiṃ dīpa bigyāna bujhāī..
graṃthi na chūṭi miṭā sō prakāsā. buddhi bikala bhai biṣaya batāsā..
iṃdrinha suranha na gyāna sōhāī. biṣaya bhōga para prīti sadāī..
biṣaya samīra buddhi kṛta bhōrī. tēhi bidhi dīpa kō bāra bahōrī..
