चौपाई
कहेउँ नाथ हरि चरित अनूपा। ब्यास समास स्वमति अनुरुपा।।
श्रुति सिद्धांत इहइ उरगारी। राम भजिअ सब काज बिसारी।।
प्रभु रघुपति तजि सेइअ काही। मोहि से सठ पर ममता जाही।।
तुम्ह बिग्यानरूप नहिं मोहा। नाथ कीन्हि मो पर अति छोहा।।
पूछिहुँ राम कथा अति पावनि। सुक सनकादि संभु मन भावनि।।
सत संगति दुर्लभ संसारा। निमिष दंड भरि एकउ बारा।।
देखु गरुड़ निज हृदयँ बिचारी। मैं रघुबीर भजन अधिकारी।।
सकुनाधम सब भाँति अपावन। प्रभु मोहि कीन्ह बिदित जग पावन।।
दोहा/सोरठा
आजु धन्य मैं धन्य अति जद्यपि सब बिधि हीन।
निज जन जानि राम मोहि संत समागम दीन।।123(क)।।
नाथ जथामति भाषेउँ राखेउँ नहिं कछु गोइ।
चरित सिंधु रघुनायक थाह कि पावइ कोइ।।123।।
चौपाई
सुमिरि राम के गुन गन नाना। पुनि पुनि हरष भुसुंडि सुजाना।।
महिमा निगम नेति करि गाई। अतुलित बल प्रताप प्रभुताई।।
सिव अज पूज्य चरन रघुराई। मो पर कृपा परम मृदुलाई।।
अस सुभाउ कहुँ सुनउँ न देखउँ। केहि खगेस रघुपति सम लेखउँ।।
साधक सिद्ध बिमुक्त उदासी। कबि कोबिद कृतग्य संन्यासी।।
जोगी सूर सुतापस ग्यानी। धर्म निरत पंडित बिग्यानी।।
तरहिं न बिनु सेएँ मम स्वामी। राम नमामि नमामि नमामी।।
सरन गएँ मो से अघ रासी। होहिं सुद्ध नमामि अबिनासी।।
चौपाई
kahēuom nātha hari carita anūpā. byāsa samāsa svamati anurupā..
śruti siddhāṃta ihai uragārī. rāma bhajia saba kāja bisārī..
prabhu raghupati taji sēia kāhī. mōhi sē saṭha para mamatā jāhī..
tumha bigyānarūpa nahiṃ mōhā. nātha kīnhi mō para ati chōhā..
pūchihuom rāma kathā ati pāvani. suka sanakādi saṃbhu mana bhāvani..
sata saṃgati durlabha saṃsārā. nimiṣa daṃḍa bhari ēkau bārā..
dēkhu garuḍa nija hṛdayaom bicārī. maiṃ raghubīra bhajana adhikārī..
sakunādhama saba bhāomti apāvana. prabhu mōhi kīnha bidita jaga pāvana..
दोहा/सोरठा
āju dhanya maiṃ dhanya ati jadyapi saba bidhi hīna.
nija jana jāni rāma mōhi saṃta samāgama dīna..123ka..
nātha jathāmati bhāṣēuom rākhēuom nahiṃ kachu gōi.
carita siṃdhu raghunāyaka thāha ki pāvai kōi..123..
चौपाई
sumiri rāma kē guna gana nānā. puni puni haraṣa bhusuṃḍi sujānā..
mahimā nigama nēti kari gāī. atulita bala pratāpa prabhutāī..
siva aja pūjya carana raghurāī. mō para kṛpā parama mṛdulāī..
asa subhāu kahuom sunauom na dēkhauom. kēhi khagēsa raghupati sama lēkhauom..
sādhaka siddha bimukta udāsī. kabi kōbida kṛtagya saṃnyāsī..
jōgī sūra sutāpasa gyānī. dharma nirata paṃḍita bigyānī..
tarahiṃ na binu sēēom mama svāmī. rāma namāmi namāmi namāmī..
sarana gaēom mō sē agha rāsī. hōhiṃ suddha namāmi abināsī..
