चौपाई
तेहि बन निकट दसानन गयऊ। तब मारीच कपटमृग भयऊ।।
अति बिचित्र कछु बरनि न जाई। कनक देह मनि रचित बनाई।।
सीता परम रुचिर मृग देखा। अंग अंग सुमनोहर बेषा।।
सुनहु देव रघुबीर कृपाला। एहि मृग कर अति सुंदर छाला।।
सत्यसंध प्रभु बधि करि एही। आनहु चर्म कहति बैदेही।।
तब रघुपति जानत सब कारन। उठे हरषि सुर काजु सँवारन।।
मृग बिलोकि कटि परिकर बाँधा। करतल चाप रुचिर सर साँधा।।
प्रभु लछिमनिहि कहा समुझाई। फिरत बिपिन निसिचर बहु भाई।।
सीता केरि करेहु रखवारी। बुधि बिबेक बल समय बिचारी।।
प्रभुहि बिलोकि चला मृग भाजी। धाए रामु सरासन साजी।।
निगम नेति सिव ध्यान न पावा। मायामृग पाछें सो धावा।।
कबहुँ निकट पुनि दूरि पराई। कबहुँक प्रगटइ कबहुँ छपाई।।
प्रगटत दुरत करत छल भूरी। एहि बिधि प्रभुहि गयउ लै दूरी।।
तब तकि राम कठिन सर मारा। धरनि परेउ करि घोर पुकारा।।
लछिमन कर प्रथमहिं लै नामा। पाछें सुमिरेसि मन महुँ रामा।।
प्रान तजत प्रगटेसि निज देहा। सुमिरेसि रामु समेत सनेहा।।
अंतर प्रेम तासु पहिचाना। मुनि दुर्लभ गति दीन्हि सुजाना।।
दोहा/सोरठा
बिपुल सुमन सुर बरषहिं गावहिं प्रभु गुन गाथ।
निज पद दीन्ह असुर कहुँ दीनबंधु रघुनाथ।।27।।
चौपाई
खल बधि तुरत फिरे रघुबीरा। सोह चाप कर कटि तूनीरा।।
आरत गिरा सुनी जब सीता। कह लछिमन सन परम सभीता।।
जाहु बेगि संकट अति भ्राता। लछिमन बिहसि कहा सुनु माता।।
भृकुटि बिलास सृष्टि लय होई। सपनेहुँ संकट परइ कि सोई।।
मरम बचन जब सीता बोला। हरि प्रेरित लछिमन मन डोला।।
बन दिसि देव सौंपि सब काहू। चले जहाँ रावन ससि राहू।।
सून बीच दसकंधर देखा। आवा निकट जती कें बेषा।।
जाकें डर सुर असुर डेराहीं। निसि न नीद दिन अन्न न खाहीं।।
सो दससीस स्वान की नाई। इत उत चितइ चला भड़िहाई।।
इमि कुपंथ पग देत खगेसा। रह न तेज बुधि बल लेसा।।
नाना बिधि करि कथा सुहाई। राजनीति भय प्रीति देखाई।।
कह सीता सुनु जती गोसाईं। बोलेहु बचन दुष्ट की नाईं।।
तब रावन निज रूप देखावा। भई सभय जब नाम सुनावा।।
कह सीता धरि धीरजु गाढ़ा। आइ गयउ प्रभु रहु खल ठाढ़ा।।
जिमि हरिबधुहि छुद्र सस चाहा। भएसि कालबस निसिचर नाहा।।
सुनत बचन दससीस रिसाना। मन महुँ चरन बंदि सुख माना।।
दोहा/सोरठा
क्रोधवंत तब रावन लीन्हिसि रथ बैठाइ।
चला गगनपथ आतुर भयँ रथ हाँकि न जाइ।।28।।
चौपाई
tēhi bana nikaṭa dasānana gayaū. taba mārīca kapaṭamṛga bhayaū..
ati bicitra kachu barani na jāī. kanaka dēha mani racita banāī..
sītā parama rucira mṛga dēkhā. aṃga aṃga sumanōhara bēṣā..
sunahu dēva raghubīra kṛpālā. ēhi mṛga kara ati suṃdara chālā..
satyasaṃdha prabhu badhi kari ēhī. ānahu carma kahati baidēhī..
taba raghupati jānata saba kārana. uṭhē haraṣi sura kāju saomvārana..
mṛga bilōki kaṭi parikara bāomdhā. karatala cāpa rucira sara sāomdhā..
prabhu lachimanihi kahā samujhāī. phirata bipina nisicara bahu bhāī..
sītā kēri karēhu rakhavārī. budhi bibēka bala samaya bicārī..
prabhuhi bilōki calā mṛga bhājī. dhāē rāmu sarāsana sājī..
nigama nēti siva dhyāna na pāvā. māyāmṛga pāchēṃ sō dhāvā..
kabahuom nikaṭa puni dūri parāī. kabahuomka pragaṭai kabahuom chapāī..
pragaṭata durata karata chala bhūrī. ēhi bidhi prabhuhi gayau lai dūrī..
taba taki rāma kaṭhina sara mārā. dharani parēu kari ghōra pukārā..
lachimana kara prathamahiṃ lai nāmā. pāchēṃ sumirēsi mana mahuom rāmā..
prāna tajata pragaṭēsi nija dēhā. sumirēsi rāmu samēta sanēhā..
aṃtara prēma tāsu pahicānā. muni durlabha gati dīnhi sujānā..
चौपाई
khala badhi turata phirē raghubīrā. sōha cāpa kara kaṭi tūnīrā..
ārata girā sunī jaba sītā. kaha lachimana sana parama sabhītā..
jāhu bēgi saṃkaṭa ati bhrātā. lachimana bihasi kahā sunu mātā..
bhṛkuṭi bilāsa sṛṣṭi laya hōī. sapanēhuom saṃkaṭa parai ki sōī..
marama bacana jaba sītā bōlā. hari prērita lachimana mana ḍōlā..
bana disi dēva sauṃpi saba kāhū. calē jahāom rāvana sasi rāhū..
sūna bīca dasakaṃdhara dēkhā. āvā nikaṭa jatī kēṃ bēṣā..
jākēṃ ḍara sura asura ḍērāhīṃ. nisi na nīda dina anna na khāhīṃ..
sō dasasīsa svāna kī nāī. ita uta citai calā bhaḍaihāī..
imi kupaṃtha paga dēta khagēsā. raha na tēja budhi bala lēsā..
nānā bidhi kari kathā suhāī. rājanīti bhaya prīti dēkhāī..
kaha sītā sunu jatī gōsāīṃ. bōlēhu bacana duṣṭa kī nāīṃ..
taba rāvana nija rūpa dēkhāvā. bhaī sabhaya jaba nāma sunāvā..
kaha sītā dhari dhīraju gāḍhaā. āi gayau prabhu rahu khala ṭhāḍhaā..
jimi haribadhuhi chudra sasa cāhā. bhaēsi kālabasa nisicara nāhā..
sunata bacana dasasīsa risānā. mana mahuom carana baṃdi sukha mānā..
