चौपाई
राम बचन सुनि सभय समाजू। जनु जलनिधि महुँ बिकल जहाजू।।
सुनि गुर गिरा सुमंगल मूला। भयउ मनहुँ मारुत अनुकुला।।
पावन पयँ तिहुँ काल नहाहीं। जो बिलोकि अंघ ओघ नसाहीं।।
मंगलमूरति लोचन भरि भरि। निरखहिं हरषि दंडवत करि करि।।
राम सैल बन देखन जाहीं। जहँ सुख सकल सकल दुख नाहीं।।
झरना झरिहिं सुधासम बारी। त्रिबिध तापहर त्रिबिध बयारी।।
बिटप बेलि तृन अगनित जाती। फल प्रसून पल्लव बहु भाँती।।
सुंदर सिला सुखद तरु छाहीं। जाइ बरनि बन छबि केहि पाहीं।।
दोहा/सोरठा
सरनि सरोरुह जल बिहग कूजत गुंजत भृंग।
बैर बिगत बिहरत बिपिन मृग बिहंग बहुरंग।।249।।
चौपाई
कोल किरात भिल्ल बनबासी। मधु सुचि सुंदर स्वादु सुधा सी।।
भरि भरि परन पुटीं रचि रुरी। कंद मूल फल अंकुर जूरी।।
सबहि देहिं करि बिनय प्रनामा। कहि कहि स्वाद भेद गुन नामा।।
देहिं लोग बहु मोल न लेहीं। फेरत राम दोहाई देहीं।।
कहहिं सनेह मगन मृदु बानी। मानत साधु पेम पहिचानी।।
तुम्ह सुकृती हम नीच निषादा। पावा दरसनु राम प्रसादा।।
हमहि अगम अति दरसु तुम्हारा। जस मरु धरनि देवधुनि धारा।।
राम कृपाल निषाद नेवाजा। परिजन प्रजउ चहिअ जस राजा।।
दोहा/सोरठा
यह जिंयँ जानि सँकोचु तजि करिअ छोहु लखि नेहु।
हमहि कृतारथ करन लगि फल तृन अंकुर लेहु।।250।।
चौपाई
rāma bacana suni sabhaya samājū. janu jalanidhi mahuom bikala jahājū..
suni gura girā sumaṃgala mūlā. bhayau manahuom māruta anukulā..
pāvana payaom tihuom kāla nahāhīṃ. jō bilōki aṃgha ōgha nasāhīṃ..
maṃgalamūrati lōcana bhari bhari. nirakhahiṃ haraṣi daṃḍavata kari kari..
rāma saila bana dēkhana jāhīṃ. jahaom sukha sakala sakala dukha nāhīṃ..
jharanā jharihiṃ sudhāsama bārī. tribidha tāpahara tribidha bayārī..
biṭapa bēli tṛna aganita jātī. phala prasūna pallava bahu bhāomtī..
suṃdara silā sukhada taru chāhīṃ. jāi barani bana chabi kēhi pāhīṃ..
चौपाई
kōla kirāta bhilla banabāsī. madhu suci suṃdara svādu sudhā sī..
bhari bhari parana puṭīṃ raci rurī. kaṃda mūla phala aṃkura jūrī..
sabahi dēhiṃ kari binaya pranāmā. kahi kahi svāda bhēda guna nāmā..
dēhiṃ lōga bahu mōla na lēhīṃ. phērata rāma dōhāī dēhīṃ..
kahahiṃ sanēha magana mṛdu bānī. mānata sādhu pēma pahicānī..
tumha sukṛtī hama nīca niṣādā. pāvā darasanu rāma prasādā..
hamahi agama ati darasu tumhārā. jasa maru dharani dēvadhuni dhārā..
rāma kṛpāla niṣāda nēvājā. parijana prajau cahia jasa rājā..
