चौपाई
कोसलपति गति सुनि जनकौरा। भे सब लोक सोक बस बौरा।।
जेहिं देखे तेहि समय बिदेहू। नामु सत्य अस लाग न केहू।।
रानि कुचालि सुनत नरपालहि। सूझ न कछु जस मनि बिनु ब्यालहि।।
भरत राज रघुबर बनबासू। भा मिथिलेसहि हृदयँ हराँसू।।
नृप बूझे बुध सचिव समाजू। कहहु बिचारि उचित का आजू।।
समुझि अवध असमंजस दोऊ। चलिअ कि रहिअ न कह कछु कोऊ।।
नृपहि धीर धरि हृदयँ बिचारी। पठए अवध चतुर चर चारी।।
बूझि भरत सति भाउ कुभाऊ। आएहु बेगि न होइ लखाऊ।।
दोहा/सोरठा
गए अवध चर भरत गति बूझि देखि करतूति।
चले चित्रकूटहि भरतु चार चले तेरहूति।।271।।
चौपाई
दूतन्ह आइ भरत कइ करनी। जनक समाज जथामति बरनी।।
सुनि गुर परिजन सचिव महीपति। भे सब सोच सनेहँ बिकल अति।।
धरि धीरजु करि भरत बड़ाई। लिए सुभट साहनी बोलाई।।
घर पुर देस राखि रखवारे। हय गय रथ बहु जान सँवारे।।
दुघरी साधि चले ततकाला। किए बिश्रामु न मग महीपाला।।
भोरहिं आजु नहाइ प्रयागा। चले जमुन उतरन सबु लागा।।
खबरि लेन हम पठए नाथा। तिन्ह कहि अस महि नायउ माथा।।
साथ किरात छ सातक दीन्हे। मुनिबर तुरत बिदा चर कीन्हे।।
दोहा/सोरठा
सुनत जनक आगवनु सबु हरषेउ अवध समाजु।
रघुनंदनहि सकोचु बड़ सोच बिबस सुरराजु।।272।।
चौपाई
kōsalapati gati suni janakaurā. bhē saba lōka sōka basa baurā..
jēhiṃ dēkhē tēhi samaya bidēhū. nāmu satya asa lāga na kēhū..
rāni kucāli sunata narapālahi. sūjha na kachu jasa mani binu byālahi..
bharata rāja raghubara banabāsū. bhā mithilēsahi hṛdayaom harāomsū..
nṛpa būjhē budha saciva samājū. kahahu bicāri ucita kā ājū..
samujhi avadha asamaṃjasa dōū. calia ki rahia na kaha kachu kōū..
nṛpahi dhīra dhari hṛdayaom bicārī. paṭhaē avadha catura cara cārī..
būjhi bharata sati bhāu kubhāū. āēhu bēgi na hōi lakhāū..
चौपाई
dūtanha āi bharata kai karanī. janaka samāja jathāmati baranī..
suni gura parijana saciva mahīpati. bhē saba sōca sanēhaom bikala ati..
dhari dhīraju kari bharata baḍaāī. liē subhaṭa sāhanī bōlāī..
ghara pura dēsa rākhi rakhavārē. haya gaya ratha bahu jāna saomvārē..
dugharī sādhi calē tatakālā. kiē biśrāmu na maga mahīpālā..
bhōrahiṃ āju nahāi prayāgā. calē jamuna utarana sabu lāgā..
khabari lēna hama paṭhaē nāthā. tinha kahi asa mahi nāyau māthā..
sātha kirāta cha sātaka dīnhē. munibara turata bidā cara kīnhē..
