चौपाई
भाइ सचिव गुर पुरजन साथा। आगें गवनु कीन्ह रघुनाथा।।
गिरिबरु दीख जनकपति जबहीं। करि प्रनाम रथ त्यागेउ तबहीं।।
राम दरस लालसा उछाहू। पथ श्रम लेसु कलेसु न काहू।।
मन तहँ जहँ रघुबर बैदेही। बिनु मन तन दुख सुख सुधि केही।।
आवत जनकु चले एहि भाँती। सहित समाज प्रेम मति माती।।
आए निकट देखि अनुरागे। सादर मिलन परसपर लागे।।
लगे जनक मुनिजन पद बंदन। रिषिन्ह प्रनामु कीन्ह रघुनंदन।।
भाइन्ह सहित रामु मिलि राजहि। चले लवाइ समेत समाजहि।।
दोहा/सोरठा
आश्रम सागर सांत रस पूरन पावन पाथु।
सेन मनहुँ करुना सरित लिएँ जाहिं रघुनाथु।।275।।
चौपाई
बोरति ग्यान बिराग करारे। बचन ससोक मिलत नद नारे।।
सोच उसास समीर तंरगा। धीरज तट तरुबर कर भंगा।।
बिषम बिषाद तोरावति धारा। भय भ्रम भवँर अबर्त अपारा।।
केवट बुध बिद्या बड़ि नावा। सकहिं न खेइ ऐक नहिं आवा।।
बनचर कोल किरात बिचारे। थके बिलोकि पथिक हियँ हारे।।
आश्रम उदधि मिली जब जाई। मनहुँ उठेउ अंबुधि अकुलाई।।
सोक बिकल दोउ राज समाजा। रहा न ग्यानु न धीरजु लाजा।।
भूप रूप गुन सील सराही। रोवहिं सोक सिंधु अवगाही।।
चौपाई
bhāi saciva gura purajana sāthā. āgēṃ gavanu kīnha raghunāthā..
giribaru dīkha janakapati jabahīṃ. kari pranāma ratha tyāgēu tabahīṃ..
rāma darasa lālasā uchāhū. patha śrama lēsu kalēsu na kāhū..
mana tahaom jahaom raghubara baidēhī. binu mana tana dukha sukha sudhi kēhī..
āvata janaku calē ēhi bhāomtī. sahita samāja prēma mati mātī..
āē nikaṭa dēkhi anurāgē. sādara milana parasapara lāgē..
lagē janaka munijana pada baṃdana. riṣinha pranāmu kīnha raghunaṃdana..
bhāinha sahita rāmu mili rājahi. calē lavāi samēta samājahi..
चौपाई
bōrati gyāna birāga karārē. bacana sasōka milata nada nārē..
sōca usāsa samīra taṃragā. dhīraja taṭa tarubara kara bhaṃgā..
biṣama biṣāda tōrāvati dhārā. bhaya bhrama bhavaomra abarta apārā..
kēvaṭa budha bidyā baḍai nāvā. sakahiṃ na khēi aika nahiṃ āvā..
banacara kōla kirāta bicārē. thakē bilōki pathika hiyaom hārē..
āśrama udadhi milī jaba jāī. manahuom uṭhēu aṃbudhi akulāī..
sōka bikala dōu rāja samājā. rahā na gyānu na dhīraju lājā..
bhūpa rūpa guna sīla sarāhī. rōvahiṃ sōka siṃdhu avagāhī..
