चौपाई
सभा सकल सुनि रघुबर बानी। प्रेम पयोधि अमिअ जनु सानी।।
सिथिल समाज सनेह समाधी। देखि दसा चुप सारद साधी।।
भरतहि भयउ परम संतोषू। सनमुख स्वामि बिमुख दुख दोषू।।
मुख प्रसन्न मन मिटा बिषादू। भा जनु गूँगेहि गिरा प्रसादू।।
कीन्ह सप्रेम प्रनामु बहोरी। बोले पानि पंकरुह जोरी।।
नाथ भयउ सुखु साथ गए को। लहेउँ लाहु जग जनमु भए को।।
अब कृपाल जस आयसु होई। करौं सीस धरि सादर सोई।।
सो अवलंब देव मोहि देई। अवधि पारु पावौं जेहि सेई।।
दोहा/सोरठा
देव देव अभिषेक हित गुर अनुसासनु पाइ।
आनेउँ सब तीरथ सलिलु तेहि कहँ काह रजाइ।।307।।
चौपाई
एकु मनोरथु बड़ मन माहीं। सभयँ सकोच जात कहि नाहीं।।
कहहु तात प्रभु आयसु पाई। बोले बानि सनेह सुहाई।।
चित्रकूट सुचि थल तीरथ बन। खग मृग सर सरि निर्झर गिरिगन।।
प्रभु पद अंकित अवनि बिसेषी। आयसु होइ त आवौं देखी।।
अवसि अत्रि आयसु सिर धरहू। तात बिगतभय कानन चरहू।।
मुनि प्रसाद बनु मंगल दाता। पावन परम सुहावन भ्राता।।
रिषिनायकु जहँ आयसु देहीं। राखेहु तीरथ जलु थल तेहीं।।
सुनि प्रभु बचन भरत सुख पावा। मुनि पद कमल मुदित सिरु नावा।।
दोहा/सोरठा
भरत राम संबादु सुनि सकल सुमंगल मूल।
सुर स्वारथी सराहि कुल बरषत सुरतरु फूल।।308।।
चौपाई
sabhā sakala suni raghubara bānī. prēma payōdhi amia janu sānī..
sithila samāja sanēha samādhī. dēkhi dasā cupa sārada sādhī..
bharatahi bhayau parama saṃtōṣū. sanamukha svāmi bimukha dukha dōṣū..
mukha prasanna mana miṭā biṣādū. bhā janu gūomgēhi girā prasādū..
kīnha saprēma pranāmu bahōrī. bōlē pāni paṃkaruha jōrī..
nātha bhayau sukhu sātha gaē kō. lahēuom lāhu jaga janamu bhaē kō..
aba kṛpāla jasa āyasu hōī. karauṃ sīsa dhari sādara sōī..
sō avalaṃba dēva mōhi dēī. avadhi pāru pāvauṃ jēhi sēī..
चौपाई
ēku manōrathu baḍa mana māhīṃ. sabhayaom sakōca jāta kahi nāhīṃ..
kahahu tāta prabhu āyasu pāī. bōlē bāni sanēha suhāī..
citrakūṭa suci thala tīratha bana. khaga mṛga sara sari nirjhara girigana..
prabhu pada aṃkita avani bisēṣī. āyasu hōi ta āvauṃ dēkhī..
avasi atri āyasu sira dharahū. tāta bigatabhaya kānana carahū..
muni prasāda banu maṃgala dātā. pāvana parama suhāvana bhrātā..
riṣināyaku jahaom āyasu dēhīṃ. rākhēhu tīratha jalu thala tēhīṃ..
suni prabhu bacana bharata sukha pāvā. muni pada kamala mudita siru nāvā..
