चौपाई
सानुज राम नृपहि सिर नाई। कीन्हि बहुत बिधि बिनय बड़ाई।।
देव दया बस बड़ दुखु पायउ। सहित समाज काननहिं आयउ।।
पुर पगु धारिअ देइ असीसा। कीन्ह धीर धरि गवनु महीसा।।
मुनि महिदेव साधु सनमाने। बिदा किए हरि हर सम जाने।।
सासु समीप गए दोउ भाई। फिरे बंदि पग आसिष पाई।।
कौसिक बामदेव जाबाली। पुरजन परिजन सचिव सुचाली।।
जथा जोगु करि बिनय प्रनामा। बिदा किए सब सानुज रामा।।
नारि पुरुष लघु मध्य बड़ेरे। सब सनमानि कृपानिधि फेरे।।
दोहा/सोरठा
भरत मातु पद बंदि प्रभु सुचि सनेहँ मिलि भेंटि।
बिदा कीन्ह सजि पालकी सकुच सोच सब मेटि।।319।।
चौपाई
परिजन मातु पितहि मिलि सीता। फिरी प्रानप्रिय प्रेम पुनीता।।
करि प्रनामु भेंटी सब सासू। प्रीति कहत कबि हियँ न हुलासू।।
सुनि सिख अभिमत आसिष पाई। रही सीय दुहु प्रीति समाई।।
रघुपति पटु पालकीं मगाईं। करि प्रबोधु सब मातु चढ़ाई।।
बार बार हिलि मिलि दुहु भाई। सम सनेहँ जननी पहुँचाई।।
साजि बाजि गज बाहन नाना। भरत भूप दल कीन्ह पयाना।।
हृदयँ रामु सिय लखन समेता। चले जाहिं सब लोग अचेता।।
बसह बाजि गज पसु हियँ हारें। चले जाहिं परबस मन मारें।।
दोहा/सोरठा
गुर गुरतिय पद बंदि प्रभु सीता लखन समेत।
फिरे हरष बिसमय सहित आए परन निकेत।।320।।
चौपाई
sānuja rāma nṛpahi sira nāī. kīnhi bahuta bidhi binaya baḍaāī..
dēva dayā basa baḍa dukhu pāyau. sahita samāja kānanahiṃ āyau..
pura pagu dhāria dēi asīsā. kīnha dhīra dhari gavanu mahīsā..
muni mahidēva sādhu sanamānē. bidā kiē hari hara sama jānē..
sāsu samīpa gaē dōu bhāī. phirē baṃdi paga āsiṣa pāī..
kausika bāmadēva jābālī. purajana parijana saciva sucālī..
jathā jōgu kari binaya pranāmā. bidā kiē saba sānuja rāmā..
nāri puruṣa laghu madhya baḍaērē. saba sanamāni kṛpānidhi phērē..
चौपाई
parijana mātu pitahi mili sītā. phirī prānapriya prēma punītā..
kari pranāmu bhēṃṭī saba sāsū. prīti kahata kabi hiyaom na hulāsū..
suni sikha abhimata āsiṣa pāī. rahī sīya duhu prīti samāī..
raghupati paṭu pālakīṃ magāīṃ. kari prabōdhu saba mātu caḍhaāī..
bāra bāra hili mili duhu bhāī. sama sanēhaom jananī pahuomcāī..
sāji bāji gaja bāhana nānā. bharata bhūpa dala kīnha payānā..
hṛdayaom rāmu siya lakhana samētā. calē jāhiṃ saba lōga acētā..
basaha bāji gaja pasu hiyaom hārēṃ. calē jāhiṃ parabasa mana mārēṃ..
