चौपाई
देव पितर सब तुन्हहि गोसाई। राखहुँ पलक नयन की नाई।।
अवधि अंबु प्रिय परिजन मीना। तुम्ह करुनाकर धरम धुरीना।।
अस बिचारि सोइ करहु उपाई। सबहि जिअत जेहिं भेंटेहु आई।।
जाहु सुखेन बनहि बलि जाऊँ। करि अनाथ जन परिजन गाऊँ।।
सब कर आजु सुकृत फल बीता। भयउ कराल कालु बिपरीता।।
बहुबिधि बिलपि चरन लपटानी। परम अभागिनि आपुहि जानी।।
दारुन दुसह दाहु उर ब्यापा। बरनि न जाहिं बिलाप कलापा।।
राम उठाइ मातु उर लाई। कहि मृदु बचन बहुरि समुझाई।।
दोहा/सोरठा
समाचार तेहि समय सुनि सीय उठी अकुलाइ।
जाइ सासु पद कमल जुग बंदि बैठि सिरु नाइ।।57।।
चौपाई
दीन्हि असीस सासु मृदु बानी। अति सुकुमारि देखि अकुलानी।।
बैठि नमितमुख सोचति सीता। रूप रासि पति प्रेम पुनीता।।
चलन चहत बन जीवननाथू। केहि सुकृती सन होइहि साथू।।
की तनु प्रान कि केवल प्राना। बिधि करतबु कछु जाइ न जाना।।
चारु चरन नख लेखति धरनी। नूपुर मुखर मधुर कबि बरनी।।
मनहुँ प्रेम बस बिनती करहीं। हमहि सीय पद जनि परिहरहीं।।
मंजु बिलोचन मोचति बारी। बोली देखि राम महतारी।।
तात सुनहु सिय अति सुकुमारी। सासु ससुर परिजनहि पिआरी।।
दोहा/सोरठा
पिता जनक भूपाल मनि ससुर भानुकुल भानु।
पति रबिकुल कैरव बिपिन बिधु गुन रूप निधानु।।58।।
चौपाई
dēva pitara saba tunhahi gōsāī. rākhahuom palaka nayana kī nāī..
avadhi aṃbu priya parijana mīnā. tumha karunākara dharama dhurīnā..
asa bicāri sōi karahu upāī. sabahi jiata jēhiṃ bhēṃṭēhu āī..
jāhu sukhēna banahi bali jāūom. kari anātha jana parijana gāūom..
saba kara āju sukṛta phala bītā. bhayau karāla kālu biparītā..
bahubidhi bilapi carana lapaṭānī. parama abhāgini āpuhi jānī..
dāruna dusaha dāhu ura byāpā. barani na jāhiṃ bilāpa kalāpā..
rāma uṭhāi mātu ura lāī. kahi mṛdu bacana bahuri samujhāī..
चौपाई
dīnhi asīsa sāsu mṛdu bānī. ati sukumāri dēkhi akulānī..
baiṭhi namitamukha sōcati sītā. rūpa rāsi pati prēma punītā..
calana cahata bana jīvananāthū. kēhi sukṛtī sana hōihi sāthū..
kī tanu prāna ki kēvala prānā. bidhi karatabu kachu jāi na jānā..
cāru carana nakha lēkhati dharanī. nūpura mukhara madhura kabi baranī..
manahuom prēma basa binatī karahīṃ. hamahi sīya pada jani pariharahīṃ..
maṃju bilōcana mōcati bārī. bōlī dēkhi rāma mahatārī..
tāta sunahu siya ati sukumārī. sāsu sasura parijanahi piārī..
