चौपाई
मैं पुनि पुत्रबधू प्रिय पाई। रूप रासि गुन सील सुहाई।।
नयन पुतरि करि प्रीति बढ़ाई। राखेउँ प्रान जानिकिहिं लाई।।
कलपबेलि जिमि बहुबिधि लाली। सींचि सनेह सलिल प्रतिपाली।।
फूलत फलत भयउ बिधि बामा। जानि न जाइ काह परिनामा।।
पलँग पीठ तजि गोद हिंड़ोरा। सियँ न दीन्ह पगु अवनि कठोरा।।
जिअनमूरि जिमि जोगवत रहऊँ। दीप बाति नहिं टारन कहऊँ।।
सोइ सिय चलन चहति बन साथा। आयसु काह होइ रघुनाथा।
चंद किरन रस रसिक चकोरी। रबि रुख नयन सकइ किमि जोरी।।
दोहा/सोरठा
करि केहरि निसिचर चरहिं दुष्ट जंतु बन भूरि।
बिष बाटिकाँ कि सोह सुत सुभग सजीवनि मूरि।।59।।
चौपाई
बन हित कोल किरात किसोरी। रचीं बिरंचि बिषय सुख भोरी।।
पाइन कृमि जिमि कठिन सुभाऊ। तिन्हहि कलेसु न कानन काऊ।।
कै तापस तिय कानन जोगू। जिन्ह तप हेतु तजा सब भोगू।।
सिय बन बसिहि तात केहि भाँती। चित्रलिखित कपि देखि डेराती।।
सुरसर सुभग बनज बन चारी। डाबर जोगु कि हंसकुमारी।।
अस बिचारि जस आयसु होई। मैं सिख देउँ जानकिहि सोई।।
जौं सिय भवन रहै कह अंबा। मोहि कहँ होइ बहुत अवलंबा।।
सुनि रघुबीर मातु प्रिय बानी। सील सनेह सुधाँ जनु सानी।।
दोहा/सोरठा
कहि प्रिय बचन बिबेकमय कीन्हि मातु परितोष।
लगे प्रबोधन जानकिहि प्रगटि बिपिन गुन दोष।।60।।
चौपाई
maiṃ puni putrabadhū priya pāī. rūpa rāsi guna sīla suhāī..
nayana putari kari prīti baḍhaāī. rākhēuom prāna jānikihiṃ lāī..
kalapabēli jimi bahubidhi lālī. sīṃci sanēha salila pratipālī..
phūlata phalata bhayau bidhi bāmā. jāni na jāi kāha parināmā..
palaomga pīṭha taji gōda hiṃḍaōrā. siyaom na dīnha pagu avani kaṭhōrā..
jianamūri jimi jōgavata rahaūom. dīpa bāti nahiṃ ṭārana kahaūom..
sōi siya calana cahati bana sāthā. āyasu kāha hōi raghunāthā.
caṃda kirana rasa rasika cakōrī. rabi rukha nayana sakai kimi jōrī..
चौपाई
bana hita kōla kirāta kisōrī. racīṃ biraṃci biṣaya sukha bhōrī..
pāina kṛmi jimi kaṭhina subhāū. tinhahi kalēsu na kānana kāū..
kai tāpasa tiya kānana jōgū. jinha tapa hētu tajā saba bhōgū..
siya bana basihi tāta kēhi bhāomtī. citralikhita kapi dēkhi ḍērātī..
surasara subhaga banaja bana cārī. ḍābara jōgu ki haṃsakumārī..
asa bicāri jasa āyasu hōī. maiṃ sikha dēuom jānakihi sōī..
jauṃ siya bhavana rahai kaha aṃbā. mōhi kahaom hōi bahuta avalaṃbā..
suni raghubīra mātu priya bānī. sīla sanēha sudhāom janu sānī..
