चौपाई
मुदित महिपति मंदिर आए। सेवक सचिव सुमंत्रु बोलाए।।
कहि जयजीव सीस तिन्ह नाए। भूप सुमंगल बचन सुनाए।।
जौं पाँचहि मत लागै नीका। करहु हरषि हियँ रामहि टीका।।
मंत्री मुदित सुनत प्रिय बानी। अभिमत बिरवँ परेउ जनु पानी।।
बिनती सचिव करहि कर जोरी। जिअहु जगतपति बरिस करोरी।।
जग मंगल भल काजु बिचारा। बेगिअ नाथ न लाइअ बारा।।
नृपहि मोदु सुनि सचिव सुभाषा। बढ़त बौंड़ जनु लही सुसाखा।।
दोहा/सोरठा
कहेउ भूप मुनिराज कर जोइ जोइ आयसु होइ।
राम राज अभिषेक हित बेगि करहु सोइ सोइ।।5।।
चौपाई
हरषि मुनीस कहेउ मृदु बानी। आनहु सकल सुतीरथ पानी।।
औषध मूल फूल फल पाना। कहे नाम गनि मंगल नाना।।
चामर चरम बसन बहु भाँती। रोम पाट पट अगनित जाती।।
मनिगन मंगल बस्तु अनेका। जो जग जोगु भूप अभिषेका।।
बेद बिदित कहि सकल बिधाना। कहेउ रचहु पुर बिबिध बिताना।।
सफल रसाल पूगफल केरा। रोपहु बीथिन्ह पुर चहुँ फेरा।।
रचहु मंजु मनि चौकें चारू। कहहु बनावन बेगि बजारू।।
पूजहु गनपति गुर कुलदेवा। सब बिधि करहु भूमिसुर सेवा।।
दोहा/सोरठा
ध्वज पताक तोरन कलस सजहु तुरग रथ नाग।
सिर धरि मुनिबर बचन सबु निज निज काजहिं लाग।।6।।
चौपाई
mudita mahipati maṃdira āē. sēvaka saciva sumaṃtru bōlāē..
kahi jayajīva sīsa tinha nāē. bhūpa sumaṃgala bacana sunāē..
jauṃ pāomcahi mata lāgai nīkā. karahu haraṣi hiyaom rāmahi ṭīkā..
maṃtrī mudita sunata priya bānī. abhimata biravaom parēu janu pānī..
binatī saciva karahi kara jōrī. jiahu jagatapati barisa karōrī..
jaga maṃgala bhala kāju bicārā. bēgia nātha na lāia bārā..
nṛpahi mōdu suni saciva subhāṣā. baḍhata bauṃḍa janu lahī susākhā..
चौपाई
haraṣi munīsa kahēu mṛdu bānī. ānahu sakala sutīratha pānī..
auṣadha mūla phūla phala pānā. kahē nāma gani maṃgala nānā..
cāmara carama basana bahu bhāomtī. rōma pāṭa paṭa aganita jātī..
manigana maṃgala bastu anēkā. jō jaga jōgu bhūpa abhiṣēkā..
bēda bidita kahi sakala bidhānā. kahēu racahu pura bibidha bitānā..
saphala rasāla pūgaphala kērā. rōpahu bīthinha pura cahuom phērā..
racahu maṃju mani caukēṃ cārū. kahahu banāvana bēgi bajārū..
pūjahu ganapati gura kuladēvā. saba bidhi karahu bhūmisura sēvā..
