चौपाई
पुत्रवती जुबती जग सोई। रघुपति भगतु जासु सुतु होई।।
नतरु बाँझ भलि बादि बिआनी। राम बिमुख सुत तें हित जानी।।
तुम्हरेहिं भाग रामु बन जाहीं। दूसर हेतु तात कछु नाहीं।।
सकल सुकृत कर बड़ फलु एहू। राम सीय पद सहज सनेहू।।
राग रोषु इरिषा मदु मोहू। जनि सपनेहुँ इन्ह के बस होहू।।
सकल प्रकार बिकार बिहाई। मन क्रम बचन करेहु सेवकाई।।
तुम्ह कहुँ बन सब भाँति सुपासू। सँग पितु मातु रामु सिय जासू।।
जेहिं न रामु बन लहहिं कलेसू। सुत सोइ करेहु इहइ उपदेसू।।
छंद
उपदेसु यहु जेहिं तात तुम्हरे राम सिय सुख पावहीं।
पितु मातु प्रिय परिवार पुर सुख सुरति बन बिसरावहीं।।
तुलसी प्रभुहि सिख देइ आयसु दीन्ह पुनि आसिष दई।
रति होउ अबिरल अमल सिय रघुबीर पद नित नित नई।।
दोहा/सोरठा
मातु चरन सिरु नाइ चले तुरत संकित हृदयँ।
बागुर बिषम तोराइ मनहुँ भाग मृगु भाग बस।।75।।
चौपाई
गए लखनु जहँ जानकिनाथू। भे मन मुदित पाइ प्रिय साथू।।
बंदि राम सिय चरन सुहाए। चले संग नृपमंदिर आए।।
कहहिं परसपर पुर नर नारी। भलि बनाइ बिधि बात बिगारी।।
तन कृस दुखु बदन मलीने। बिकल मनहुँ माखी मधु छीने।।
कर मीजहिं सिरु धुनि पछिताहीं। जनु बिन पंख बिहग अकुलाहीं।।
भइ बड़ि भीर भूप दरबारा। बरनि न जाइ बिषादु अपारा।।
सचिवँ उठाइ राउ बैठारे। कहि प्रिय बचन रामु पगु धारे।।
सिय समेत दोउ तनय निहारी। ब्याकुल भयउ भूमिपति भारी।।
दोहा/सोरठा
सीय सहित सुत सुभग दोउ देखि देखि अकुलाइ।
बारहिं बार सनेह बस राउ लेइ उर लाइ।।76।।
चौपाई
putravatī jubatī jaga sōī. raghupati bhagatu jāsu sutu hōī..
nataru bāomjha bhali bādi biānī. rāma bimukha suta tēṃ hita jānī..
tumharēhiṃ bhāga rāmu bana jāhīṃ. dūsara hētu tāta kachu nāhīṃ..
sakala sukṛta kara baḍa phalu ēhū. rāma sīya pada sahaja sanēhū..
rāga rōṣu iriṣā madu mōhū. jani sapanēhuom inha kē basa hōhū..
sakala prakāra bikāra bihāī. mana krama bacana karēhu sēvakāī..
tumha kahuom bana saba bhāomti supāsū. saomga pitu mātu rāmu siya jāsū..
jēhiṃ na rāmu bana lahahiṃ kalēsū. suta sōi karēhu ihai upadēsū..
चौपाई
gaē lakhanu jahaom jānakināthū. bhē mana mudita pāi priya sāthū..
baṃdi rāma siya carana suhāē. calē saṃga nṛpamaṃdira āē..
kahahiṃ parasapara pura nara nārī. bhali banāi bidhi bāta bigārī..
tana kṛsa dukhu badana malīnē. bikala manahuom mākhī madhu chīnē..
kara mījahiṃ siru dhuni pachitāhīṃ. janu bina paṃkha bihaga akulāhīṃ..
bhai baḍai bhīra bhūpa darabārā. barani na jāi biṣādu apārā..
sacivaom uṭhāi rāu baiṭhārē. kahi priya bacana rāmu pagu dhārē..
siya samēta dōu tanaya nihārī. byākula bhayau bhūmipati bhārī..
