चौपाई
बिबिध बसन उपधान तुराई। छीर फेन मृदु बिसद सुहाई।।
तहँ सिय रामु सयन निसि करहीं। निज छबि रति मनोज मदु हरहीं।।
ते सिय रामु साथरीं सोए। श्रमित बसन बिनु जाहिं न जोए।।
मातु पिता परिजन पुरबासी। सखा सुसील दास अरु दासी।।
जोगवहिं जिन्हहि प्रान की नाई। महि सोवत तेइ राम गोसाईं।।
पिता जनक जग बिदित प्रभाऊ। ससुर सुरेस सखा रघुराऊ।।
रामचंदु पति सो बैदेही। सोवत महि बिधि बाम न केही।।
सिय रघुबीर कि कानन जोगू। करम प्रधान सत्य कह लोगू।।
दोहा/सोरठा
कैकयनंदिनि मंदमति कठिन कुटिलपनु कीन्ह।
जेहीं रघुनंदन जानकिहि सुख अवसर दुखु दीन्ह।।91।।
चौपाई
भइ दिनकर कुल बिटप कुठारी। कुमति कीन्ह सब बिस्व दुखारी।।
भयउ बिषादु निषादहि भारी। राम सीय महि सयन निहारी।।
बोले लखन मधुर मृदु बानी। ग्यान बिराग भगति रस सानी।।
काहु न कोउ सुख दुख कर दाता। निज कृत करम भोग सबु भ्राता।।
जोग बियोग भोग भल मंदा। हित अनहित मध्यम भ्रम फंदा।।
जनमु मरनु जहँ लगि जग जालू। संपती बिपति करमु अरु कालू।।
धरनि धामु धनु पुर परिवारू। सरगु नरकु जहँ लगि ब्यवहारू।।
देखिअ सुनिअ गुनिअ मन माहीं। मोह मूल परमारथु नाहीं।।
दोहा/सोरठा
सपनें होइ भिखारि नृप रंकु नाकपति होइ।
जागें लाभु न हानि कछु तिमि प्रपंच जियँ जोइ।।92।।
चौपाई
bibidha basana upadhāna turāī. chīra phēna mṛdu bisada suhāī..
tahaom siya rāmu sayana nisi karahīṃ. nija chabi rati manōja madu harahīṃ..
tē siya rāmu sātharīṃ sōē. śramita basana binu jāhiṃ na jōē..
mātu pitā parijana purabāsī. sakhā susīla dāsa aru dāsī..
jōgavahiṃ jinhahi prāna kī nāī. mahi sōvata tēi rāma gōsāīṃ..
pitā janaka jaga bidita prabhāū. sasura surēsa sakhā raghurāū..
rāmacaṃdu pati sō baidēhī. sōvata mahi bidhi bāma na kēhī..
siya raghubīra ki kānana jōgū. karama pradhāna satya kaha lōgū..
चौपाई
bhai dinakara kula biṭapa kuṭhārī. kumati kīnha saba bisva dukhārī..
bhayau biṣādu niṣādahi bhārī. rāma sīya mahi sayana nihārī..
bōlē lakhana madhura mṛdu bānī. gyāna birāga bhagati rasa sānī..
kāhu na kōu sukha dukha kara dātā. nija kṛta karama bhōga sabu bhrātā..
jōga biyōga bhōga bhala maṃdā. hita anahita madhyama bhrama phaṃdā..
janamu maranu jahaom lagi jaga jālū. saṃpatī bipati karamu aru kālū..
dharani dhāmu dhanu pura parivārū. saragu naraku jahaom lagi byavahārū..
dēkhia sunia gunia mana māhīṃ. mōha mūla paramārathu nāhīṃ..
