चौपाई
अस बिचारि नहिं कीजअ रोसू। काहुहि बादि न देइअ दोसू।।
मोह निसाँ सबु सोवनिहारा। देखिअ सपन अनेक प्रकारा।।
एहिं जग जामिनि जागहिं जोगी। परमारथी प्रपंच बियोगी।।
जानिअ तबहिं जीव जग जागा। जब जब बिषय बिलास बिरागा।।
होइ बिबेकु मोह भ्रम भागा। तब रघुनाथ चरन अनुरागा।।
सखा परम परमारथु एहू। मन क्रम बचन राम पद नेहू।।
राम ब्रह्म परमारथ रूपा। अबिगत अलख अनादि अनूपा।।
सकल बिकार रहित गतभेदा। कहि नित नेति निरूपहिं बेदा।
दोहा/सोरठा
भगत भूमि भूसुर सुरभि सुर हित लागि कृपाल।
करत चरित धरि मनुज तनु सुनत मिटहि जग जाल।।93।।
चौपाई
सखा समुझि अस परिहरि मोहु। सिय रघुबीर चरन रत होहू।।
कहत राम गुन भा भिनुसारा। जागे जग मंगल सुखदारा।।
सकल सोच करि राम नहावा। सुचि सुजान बट छीर मगावा।।
अनुज सहित सिर जटा बनाए। देखि सुमंत्र नयन जल छाए।।
हृदयँ दाहु अति बदन मलीना। कह कर जोरि बचन अति दीना।।
नाथ कहेउ अस कोसलनाथा। लै रथु जाहु राम कें साथा।।
बनु देखाइ सुरसरि अन्हवाई। आनेहु फेरि बेगि दोउ भाई।।
लखनु रामु सिय आनेहु फेरी। संसय सकल सँकोच निबेरी।।
दोहा/सोरठा
नृप अस कहेउ गोसाईं जस कहइ करौं बलि सोइ।
करि बिनती पायन्ह परेउ दीन्ह बाल जिमि रोइ।।94।।
चौपाई
asa bicāri nahiṃ kījaa rōsū. kāhuhi bādi na dēia dōsū..
mōha nisāom sabu sōvanihārā. dēkhia sapana anēka prakārā..
ēhiṃ jaga jāmini jāgahiṃ jōgī. paramārathī prapaṃca biyōgī..
jānia tabahiṃ jīva jaga jāgā. jaba jaba biṣaya bilāsa birāgā..
hōi bibēku mōha bhrama bhāgā. taba raghunātha carana anurāgā..
sakhā parama paramārathu ēhū. mana krama bacana rāma pada nēhū..
rāma brahma paramāratha rūpā. abigata alakha anādi anūpā..
sakala bikāra rahita gatabhēdā. kahi nita nēti nirūpahiṃ bēdā.
चौपाई
sakhā samujhi asa parihari mōhu. siya raghubīra carana rata hōhū..
kahata rāma guna bhā bhinusārā. jāgē jaga maṃgala sukhadārā..
sakala sōca kari rāma nahāvā. suci sujāna baṭa chīra magāvā..
anuja sahita sira jaṭā banāē. dēkhi sumaṃtra nayana jala chāē..
hṛdayaom dāhu ati badana malīnā. kaha kara jōri bacana ati dīnā..
nātha kahēu asa kōsalanāthā. lai rathu jāhu rāma kēṃ sāthā..
banu dēkhāi surasari anhavāī. ānēhu phēri bēgi dōu bhāī..
lakhanu rāmu siya ānēhu phērī. saṃsaya sakala saomkōca nibērī..
