चौपाई
तात कृपा करि कीजिअ सोई। जातें अवध अनाथ न होई।।
मंत्रहि राम उठाइ प्रबोधा। तात धरम मतु तुम्ह सबु सोधा।।
सिबि दधीचि हरिचंद नरेसा। सहे धरम हित कोटि कलेसा।।
रंतिदेव बलि भूप सुजाना। धरमु धरेउ सहि संकट नाना।।
धरमु न दूसर सत्य समाना। आगम निगम पुरान बखाना।।
मैं सोइ धरमु सुलभ करि पावा। तजें तिहूँ पुर अपजसु छावा।।
संभावित कहुँ अपजस लाहू। मरन कोटि सम दारुन दाहू।।
तुम्ह सन तात बहुत का कहऊँ। दिएँ उतरु फिरि पातकु लहऊँ।।
दोहा/सोरठा
पितु पद गहि कहि कोटि नति बिनय करब कर जोरि।
चिंता कवनिहु बात कै तात करिअ जनि मोरि।।95।।
चौपाई
तुम्ह पुनि पितु सम अति हित मोरें। बिनती करउँ तात कर जोरें।।
सब बिधि सोइ करतब्य तुम्हारें। दुख न पाव पितु सोच हमारें।।
सुनि रघुनाथ सचिव संबादू। भयउ सपरिजन बिकल निषादू।।
पुनि कछु लखन कही कटु बानी। प्रभु बरजे बड़ अनुचित जानी।।
सकुचि राम निज सपथ देवाई। लखन सँदेसु कहिअ जनि जाई।।
कह सुमंत्रु पुनि भूप सँदेसू। सहि न सकिहि सिय बिपिन कलेसू।।
जेहि बिधि अवध आव फिरि सीया। सोइ रघुबरहि तुम्हहि करनीया।।
नतरु निपट अवलंब बिहीना। मैं न जिअब जिमि जल बिनु मीना।।
दोहा/सोरठा
मइकें ससरें सकल सुख जबहिं जहाँ मनु मान।।
तँह तब रहिहि सुखेन सिय जब लगि बिपति बिहान।।96।।
चौपाई
tāta kṛpā kari kījia sōī. jātēṃ avadha anātha na hōī..
maṃtrahi rāma uṭhāi prabōdhā. tāta dharama matu tumha sabu sōdhā..
sibi dadhīci haricaṃda narēsā. sahē dharama hita kōṭi kalēsā..
raṃtidēva bali bhūpa sujānā. dharamu dharēu sahi saṃkaṭa nānā..
dharamu na dūsara satya samānā. āgama nigama purāna bakhānā..
maiṃ sōi dharamu sulabha kari pāvā. tajēṃ tihūom pura apajasu chāvā..
saṃbhāvita kahuom apajasa lāhū. marana kōṭi sama dāruna dāhū..
tumha sana tāta bahuta kā kahaūom. diēom utaru phiri pātaku lahaūom..
चौपाई
tumha puni pitu sama ati hita mōrēṃ. binatī karauom tāta kara jōrēṃ..
saba bidhi sōi karatabya tumhārēṃ. dukha na pāva pitu sōca hamārēṃ..
suni raghunātha saciva saṃbādū. bhayau saparijana bikala niṣādū..
puni kachu lakhana kahī kaṭu bānī. prabhu barajē baḍa anucita jānī..
sakuci rāma nija sapatha dēvāī. lakhana saomdēsu kahia jani jāī..
kaha sumaṃtru puni bhūpa saomdēsū. sahi na sakihi siya bipina kalēsū..
jēhi bidhi avadha āva phiri sīyā. sōi raghubarahi tumhahi karanīyā..
nataru nipaṭa avalaṃba bihīnā. maiṃ na jiaba jimi jala binu mīnā..
