चौपाई
तेल नाँव भरि नृप तनु राखा। दूत बोलाइ बहुरि अस भाषा।।
धावहु बेगि भरत पहिं जाहू। नृप सुधि कतहुँ कहहु जनि काहू।।
एतनेइ कहेहु भरत सन जाई। गुर बोलाई पठयउ दोउ भाई।।
सुनि मुनि आयसु धावन धाए। चले बेग बर बाजि लजाए।।
अनरथु अवध अरंभेउ जब तें। कुसगुन होहिं भरत कहुँ तब तें।।
देखहिं राति भयानक सपना। जागि करहिं कटु कोटि कलपना।।
बिप्र जेवाँइ देहिं दिन दाना। सिव अभिषेक करहिं बिधि नाना।।
मागहिं हृदयँ महेस मनाई। कुसल मातु पितु परिजन भाई।।
दोहा/सोरठा
एहि बिधि सोचत भरत मन धावन पहुँचे आइ।
गुर अनुसासन श्रवन सुनि चले गनेसु मनाइ।।157।।
चौपाई
चले समीर बेग हय हाँके। नाघत सरित सैल बन बाँके।।
हृदयँ सोचु बड़ कछु न सोहाई। अस जानहिं जियँ जाउँ उड़ाई।।
एक निमेष बरस सम जाई। एहि बिधि भरत नगर निअराई।।
असगुन होहिं नगर पैठारा। रटहिं कुभाँति कुखेत करारा।।
खर सिआर बोलहिं प्रतिकूला। सुनि सुनि होइ भरत मन सूला।।
श्रीहत सर सरिता बन बागा। नगरु बिसेषि भयावनु लागा।।
खग मृग हय गय जाहिं न जोए। राम बियोग कुरोग बिगोए।।
नगर नारि नर निपट दुखारी। मनहुँ सबन्हि सब संपति हारी।।
दोहा/सोरठा
पुरजन मिलिहिं न कहहिं कछु गवँहिं जोहारहिं जाहिं।
भरत कुसल पूँछि न सकहिं भय बिषाद मन माहिं।।158।।
चौपाई
tēla nāomva bhari nṛpa tanu rākhā. dūta bōlāi bahuri asa bhāṣā..
dhāvahu bēgi bharata pahiṃ jāhū. nṛpa sudhi katahuom kahahu jani kāhū..
ētanēi kahēhu bharata sana jāī. gura bōlāī paṭhayau dōu bhāī..
suni muni āyasu dhāvana dhāē. calē bēga bara bāji lajāē..
anarathu avadha araṃbhēu jaba tēṃ. kusaguna hōhiṃ bharata kahuom taba tēṃ..
dēkhahiṃ rāti bhayānaka sapanā. jāgi karahiṃ kaṭu kōṭi kalapanā..
bipra jēvāomi dēhiṃ dina dānā. siva abhiṣēka karahiṃ bidhi nānā..
māgahiṃ hṛdayaom mahēsa manāī. kusala mātu pitu parijana bhāī..
चौपाई
calē samīra bēga haya hāomkē. nāghata sarita saila bana bāomkē..
hṛdayaom sōcu baḍa kachu na sōhāī. asa jānahiṃ jiyaom jāuom uḍaāī..
ēka nimēṣa barasa sama jāī. ēhi bidhi bharata nagara niarāī..
asaguna hōhiṃ nagara paiṭhārā. raṭahiṃ kubhāomti kukhēta karārā..
khara siāra bōlahiṃ pratikūlā. suni suni hōi bharata mana sūlā..
śrīhata sara saritā bana bāgā. nagaru bisēṣi bhayāvanu lāgā..
khaga mṛga haya gaya jāhiṃ na jōē. rāma biyōga kurōga bigōē..
nagara nāri nara nipaṭa dukhārī. manahuom sabanhi saba saṃpati hārī..
