चौपाई
काम कोटि छबि स्याम सरीरा। नील कंज बारिद गंभीरा।।
अरुन चरन पकंज नख जोती। कमल दलन्हि बैठे जनु मोती।।
रेख कुलिस धवज अंकुर सोहे। नूपुर धुनि सुनि मुनि मन मोहे।।
कटि किंकिनी उदर त्रय रेखा। नाभि गभीर जान जेहि देखा।।
भुज बिसाल भूषन जुत भूरी। हियँ हरि नख अति सोभा रूरी।।
उर मनिहार पदिक की सोभा। बिप्र चरन देखत मन लोभा।।
कंबु कंठ अति चिबुक सुहाई। आनन अमित मदन छबि छाई।।
दुइ दुइ दसन अधर अरुनारे। नासा तिलक को बरनै पारे।।
सुंदर श्रवन सुचारु कपोला। अति प्रिय मधुर तोतरे बोला।।
चिक्कन कच कुंचित गभुआरे। बहु प्रकार रचि मातु सँवारे।।
पीत झगुलिआ तनु पहिराई। जानु पानि बिचरनि मोहि भाई।।
रूप सकहिं नहिं कहि श्रुति सेषा। सो जानइ सपनेहुँ जेहि देखा।।
दोहा/सोरठा
सुख संदोह मोहपर ग्यान गिरा गोतीत।
दंपति परम प्रेम बस कर सिसुचरित पुनीत।।199।।
चौपाई
एहि बिधि राम जगत पितु माता। कोसलपुर बासिन्ह सुखदाता।।
जिन्ह रघुनाथ चरन रति मानी। तिन्ह की यह गति प्रगट भवानी।।
रघुपति बिमुख जतन कर कोरी। कवन सकइ भव बंधन छोरी।।
जीव चराचर बस कै राखे। सो माया प्रभु सों भय भाखे।।
भृकुटि बिलास नचावइ ताही। अस प्रभु छाड़ि भजिअ कहु काही।।
मन क्रम बचन छाड़ि चतुराई। भजत कृपा करिहहिं रघुराई।।
एहि बिधि सिसुबिनोद प्रभु कीन्हा। सकल नगरबासिन्ह सुख दीन्हा।।
लै उछंग कबहुँक हलरावै। कबहुँ पालनें घालि झुलावै।।
दोहा/सोरठा
प्रेम मगन कौसल्या निसि दिन जात न जान।
सुत सनेह बस माता बालचरित कर गान।।200।।
चौपाई
kāma kōṭi chabi syāma sarīrā. nīla kaṃja bārida gaṃbhīrā..
aruna carana pakaṃja nakha jōtī. kamala dalanhi baiṭhē janu mōtī..
rēkha kulisa dhavaja aṃkura sōhē. nūpura dhuni suni muni mana mōhē..
kaṭi kiṃkinī udara traya rēkhā. nābhi gabhīra jāna jēhi dēkhā..
bhuja bisāla bhūṣana juta bhūrī. hiyaom hari nakha ati sōbhā rūrī..
ura manihāra padika kī sōbhā. bipra carana dēkhata mana lōbhā..
kaṃbu kaṃṭha ati cibuka suhāī. ānana amita madana chabi chāī..
dui dui dasana adhara arunārē. nāsā tilaka kō baranai pārē..
suṃdara śravana sucāru kapōlā. ati priya madhura tōtarē bōlā..
cikkana kaca kuṃcita gabhuārē. bahu prakāra raci mātu saomvārē..
pīta jhaguliā tanu pahirāī. jānu pāni bicarani mōhi bhāī..
rūpa sakahiṃ nahiṃ kahi śruti sēṣā. sō jānai sapanēhuom jēhi dēkhā..
चौपाई
ēhi bidhi rāma jagata pitu mātā. kōsalapura bāsinha sukhadātā..
jinha raghunātha carana rati mānī. tinha kī yaha gati pragaṭa bhavānī..
raghupati bimukha jatana kara kōrī. kavana sakai bhava baṃdhana chōrī..
jīva carācara basa kai rākhē. sō māyā prabhu sōṃ bhaya bhākhē..
bhṛkuṭi bilāsa nacāvai tāhī. asa prabhu chāḍai bhajia kahu kāhī..
mana krama bacana chāḍai caturāī. bhajata kṛpā karihahiṃ raghurāī..
ēhi bidhi sisubinōda prabhu kīnhā. sakala nagarabāsinha sukha dīnhā..
lai uchaṃga kabahuomka halarāvai. kabahuom pālanēṃ ghāli jhulāvai..
