चौपाई
बालचरित हरि बहुबिधि कीन्हा। अति अनंद दासन्ह कहँ दीन्हा।।
कछुक काल बीतें सब भाई। बड़े भए परिजन सुखदाई।।
चूड़ाकरन कीन्ह गुरु जाई। बिप्रन्ह पुनि दछिना बहु पाई।।
परम मनोहर चरित अपारा। करत फिरत चारिउ सुकुमारा।।
मन क्रम बचन अगोचर जोई। दसरथ अजिर बिचर प्रभु सोई।।
भोजन करत बोल जब राजा। नहिं आवत तजि बाल समाजा।।
कौसल्या जब बोलन जाई। ठुमकु ठुमकु प्रभु चलहिं पराई।।
निगम नेति सिव अंत न पावा। ताहि धरै जननी हठि धावा।।
धूरस धूरि भरें तनु आए। भूपति बिहसि गोद बैठाए।।
दोहा/सोरठा
भोजन करत चपल चित इत उत अवसरु पाइ।
भाजि चले किलकत मुख दधि ओदन लपटाइ।।203।।
चौपाई
बालचरित अति सरल सुहाए। सारद सेष संभु श्रुति गाए।।
जिन कर मन इन्ह सन नहिं राता। ते जन बंचित किए बिधाता।।
भए कुमार जबहिं सब भ्राता। दीन्ह जनेऊ गुरु पितु माता।।
गुरगृहँ गए पढ़न रघुराई। अलप काल बिद्या सब आई।।
जाकी सहज स्वास श्रुति चारी। सो हरि पढ़ यह कौतुक भारी।।
बिद्या बिनय निपुन गुन सीला। खेलहिं खेल सकल नृपलीला।।
करतल बान धनुष अति सोहा। देखत रूप चराचर मोहा।।
जिन्ह बीथिन्ह बिहरहिं सब भाई। थकित होहिं सब लोग लुगाई।।
दोहा/सोरठा
कोसलपुर बासी नर नारि बृद्ध अरु बाल।
प्रानहु ते प्रिय लागत सब कहुँ राम कृपाल।।204।।
चौपाई
bālacarita hari bahubidhi kīnhā. ati anaṃda dāsanha kahaom dīnhā..
kachuka kāla bītēṃ saba bhāī. baḍaē bhaē parijana sukhadāī..
cūḍaākarana kīnha guru jāī. bipranha puni dachinā bahu pāī..
parama manōhara carita apārā. karata phirata cāriu sukumārā..
mana krama bacana agōcara jōī. dasaratha ajira bicara prabhu sōī..
bhōjana karata bōla jaba rājā. nahiṃ āvata taji bāla samājā..
kausalyā jaba bōlana jāī. ṭhumaku ṭhumaku prabhu calahiṃ parāī..
nigama nēti siva aṃta na pāvā. tāhi dharai jananī haṭhi dhāvā..
dhūrasa dhūri bharēṃ tanu āē. bhūpati bihasi gōda baiṭhāē..
चौपाई
bālacarita ati sarala suhāē. sārada sēṣa saṃbhu śruti gāē..
jina kara mana inha sana nahiṃ rātā. tē jana baṃcita kiē bidhātā..
bhaē kumāra jabahiṃ saba bhrātā. dīnha janēū guru pitu mātā..
guragṛhaom gaē paḍhana raghurāī. alapa kāla bidyā saba āī..
jākī sahaja svāsa śruti cārī. sō hari paḍha yaha kautuka bhārī..
bidyā binaya nipuna guna sīlā. khēlahiṃ khēla sakala nṛpalīlā..
karatala bāna dhanuṣa ati sōhā. dēkhata rūpa carācara mōhā..
jinha bīthinha biharahiṃ saba bhāī. thakita hōhiṃ saba lōga lugāī..
