चौपाई
जानि कठिन सिवचाप बिसूरति। चली राखि उर स्यामल मूरति।।
प्रभु जब जात जानकी जानी। सुख सनेह सोभा गुन खानी।।
परम प्रेममय मृदु मसि कीन्ही। चारु चित भीतीं लिख लीन्ही।।
गई भवानी भवन बहोरी। बंदि चरन बोली कर जोरी।।
जय जय गिरिबरराज किसोरी। जय महेस मुख चंद चकोरी।।
जय गज बदन षड़ानन माता। जगत जननि दामिनि दुति गाता।।
नहिं तव आदि मध्य अवसाना। अमित प्रभाउ बेदु नहिं जाना।।
भव भव बिभव पराभव कारिनि। बिस्व बिमोहनि स्वबस बिहारिनि।।
दोहा/सोरठा
पतिदेवता सुतीय महुँ मातु प्रथम तव रेख।
महिमा अमित न सकहिं कहि सहस सारदा सेष।।235।।
चौपाई
सेवत तोहि सुलभ फल चारी। बरदायनी पुरारि पिआरी।।
देबि पूजि पद कमल तुम्हारे। सुर नर मुनि सब होहिं सुखारे।।
मोर मनोरथु जानहु नीकें। बसहु सदा उर पुर सबही कें।।
कीन्हेउँ प्रगट न कारन तेहीं। अस कहि चरन गहे बैदेहीं।।
बिनय प्रेम बस भई भवानी। खसी माल मूरति मुसुकानी।।
सादर सियँ प्रसादु सिर धरेऊ। बोली गौरि हरषु हियँ भरेऊ।।
सुनु सिय सत्य असीस हमारी। पूजिहि मन कामना तुम्हारी।।
नारद बचन सदा सुचि साचा। सो बरु मिलिहि जाहिं मनु राचा।।
चौपाई
jāni kaṭhina sivacāpa bisūrati. calī rākhi ura syāmala mūrati..
prabhu jaba jāta jānakī jānī. sukha sanēha sōbhā guna khānī..
parama prēmamaya mṛdu masi kīnhī. cāru cita bhītīṃ likha līnhī..
gaī bhavānī bhavana bahōrī. baṃdi carana bōlī kara jōrī..
jaya jaya giribararāja kisōrī. jaya mahēsa mukha caṃda cakōrī..
jaya gaja badana ṣaḍaānana mātā. jagata janani dāmini duti gātā..
nahiṃ tava ādi madhya avasānā. amita prabhāu bēdu nahiṃ jānā..
bhava bhava bibhava parābhava kārini. bisva bimōhani svabasa bihārini..
चौपाई
sēvata tōhi sulabha phala cārī. baradāyanī purāri piārī..
dēbi pūji pada kamala tumhārē. sura nara muni saba hōhiṃ sukhārē..
mōra manōrathu jānahu nīkēṃ. basahu sadā ura pura sabahī kēṃ..
kīnhēuom pragaṭa na kārana tēhīṃ. asa kahi carana gahē baidēhīṃ..
binaya prēma basa bhaī bhavānī. khasī māla mūrati musukānī..
sādara siyaom prasādu sira dharēū. bōlī gauri haraṣu hiyaom bharēū..
sunu siya satya asīsa hamārī. pūjihi mana kāmanā tumhārī..
nārada bacana sadā suci sācā. sō baru milihi jāhiṃ manu rācā..
