चौपाई
हृदयँ सराहत सीय लोनाई। गुर समीप गवने दोउ भाई।।
राम कहा सबु कौसिक पाहीं। सरल सुभाउ छुअत छल नाहीं।।
सुमन पाइ मुनि पूजा कीन्ही। पुनि असीस दुहु भाइन्ह दीन्ही।।
सुफल मनोरथ होहुँ तुम्हारे। रामु लखनु सुनि भए सुखारे।।
करि भोजनु मुनिबर बिग्यानी। लगे कहन कछु कथा पुरानी।।
बिगत दिवसु गुरु आयसु पाई। संध्या करन चले दोउ भाई।।
प्राची दिसि ससि उयउ सुहावा। सिय मुख सरिस देखि सुखु पावा।।
बहुरि बिचारु कीन्ह मन माहीं। सीय बदन सम हिमकर नाहीं।।
दोहा/सोरठा
जनमु सिंधु पुनि बंधु बिषु दिन मलीन सकलंक।
सिय मुख समता पाव किमि चंदु बापुरो रंक।।237।।
चौपाई
घटइ बढ़इ बिरहनि दुखदाई। ग्रसइ राहु निज संधिहिं पाई।।
कोक सिकप्रद पंकज द्रोही। अवगुन बहुत चंद्रमा तोही।।
बैदेही मुख पटतर दीन्हे। होइ दोष बड़ अनुचित कीन्हे।।
सिय मुख छबि बिधु ब्याज बखानी। गुरु पहिं चले निसा बड़ि जानी।।
करि मुनि चरन सरोज प्रनामा। आयसु पाइ कीन्ह बिश्रामा।।
बिगत निसा रघुनायक जागे। बंधु बिलोकि कहन अस लागे।।
उदउ अरुन अवलोकहु ताता। पंकज कोक लोक सुखदाता।।
बोले लखनु जोरि जुग पानी। प्रभु प्रभाउ सूचक मृदु बानी।।
दोहा/सोरठा
अरुनोदयँ सकुचे कुमुद उडगन जोति मलीन।
जिमि तुम्हार आगमन सुनि भए नृपति बलहीन।।238।।
चौपाई
hṛdayaom sarāhata sīya lōnāī. gura samīpa gavanē dōu bhāī..
rāma kahā sabu kausika pāhīṃ. sarala subhāu chuata chala nāhīṃ..
sumana pāi muni pūjā kīnhī. puni asīsa duhu bhāinha dīnhī..
suphala manōratha hōhuom tumhārē. rāmu lakhanu suni bhaē sukhārē..
kari bhōjanu munibara bigyānī. lagē kahana kachu kathā purānī..
bigata divasu guru āyasu pāī. saṃdhyā karana calē dōu bhāī..
prācī disi sasi uyau suhāvā. siya mukha sarisa dēkhi sukhu pāvā..
bahuri bicāru kīnha mana māhīṃ. sīya badana sama himakara nāhīṃ..
चौपाई
ghaṭai baḍhai birahani dukhadāī. grasai rāhu nija saṃdhihiṃ pāī..
kōka sikaprada paṃkaja drōhī. avaguna bahuta caṃdramā tōhī..
baidēhī mukha paṭatara dīnhē. hōi dōṣa baḍa anucita kīnhē..
siya mukha chabi bidhu byāja bakhānī. guru pahiṃ calē nisā baḍai jānī..
kari muni carana sarōja pranāmā. āyasu pāi kīnha biśrāmā..
bigata nisā raghunāyaka jāgē. baṃdhu bilōki kahana asa lāgē..
udau aruna avalōkahu tātā. paṃkaja kōka lōka sukhadātā..
bōlē lakhanu jōri juga pānī. prabhu prabhāu sūcaka mṛdu bānī..
