चौपाई
राजकुअँर तेहि अवसर आए। मनहुँ मनोहरता तन छाए।।
गुन सागर नागर बर बीरा। सुंदर स्यामल गौर सरीरा।।
राज समाज बिराजत रूरे। उडगन महुँ जनु जुग बिधु पूरे।।
जिन्ह कें रही भावना जैसी। प्रभु मूरति तिन्ह देखी तैसी।।
देखहिं रूप महा रनधीरा। मनहुँ बीर रसु धरें सरीरा।।
डरे कुटिल नृप प्रभुहि निहारी। मनहुँ भयानक मूरति भारी।।
रहे असुर छल छोनिप बेषा। तिन्ह प्रभु प्रगट कालसम देखा।।
पुरबासिन्ह देखे दोउ भाई। नरभूषन लोचन सुखदाई।।
दोहा/सोरठा
नारि बिलोकहिं हरषि हियँ निज निज रुचि अनुरूप।
जनु सोहत सिंगार धरि मूरति परम अनूप।।241।।
चौपाई
बिदुषन्ह प्रभु बिराटमय दीसा। बहु मुख कर पग लोचन सीसा।।
जनक जाति अवलोकहिं कैसैं। सजन सगे प्रिय लागहिं जैसें।।
सहित बिदेह बिलोकहिं रानी। सिसु सम प्रीति न जाति बखानी।।
जोगिन्ह परम तत्वमय भासा। सांत सुद्ध सम सहज प्रकासा।।
हरिभगतन्ह देखे दोउ भ्राता। इष्टदेव इव सब सुख दाता।।
रामहि चितव भायँ जेहि सीया। सो सनेहु सुखु नहिं कथनीया।।
उर अनुभवति न कहि सक सोऊ। कवन प्रकार कहै कबि कोऊ।।
एहि बिधि रहा जाहि जस भाऊ। तेहिं तस देखेउ कोसलराऊ।।
दोहा/सोरठा
राजत राज समाज महुँ कोसलराज किसोर।
सुंदर स्यामल गौर तन बिस्व बिलोचन चोर।।242।।
चौपाई
rājakuaomra tēhi avasara āē. manahuom manōharatā tana chāē..
guna sāgara nāgara bara bīrā. suṃdara syāmala gaura sarīrā..
rāja samāja birājata rūrē. uḍagana mahuom janu juga bidhu pūrē..
jinha kēṃ rahī bhāvanā jaisī. prabhu mūrati tinha dēkhī taisī..
dēkhahiṃ rūpa mahā ranadhīrā. manahuom bīra rasu dharēṃ sarīrā..
ḍarē kuṭila nṛpa prabhuhi nihārī. manahuom bhayānaka mūrati bhārī..
rahē asura chala chōnipa bēṣā. tinha prabhu pragaṭa kālasama dēkhā..
purabāsinha dēkhē dōu bhāī. narabhūṣana lōcana sukhadāī..
चौपाई
biduṣanha prabhu birāṭamaya dīsā. bahu mukha kara paga lōcana sīsā..
janaka jāti avalōkahiṃ kaisaiṃ. sajana sagē priya lāgahiṃ jaisēṃ..
sahita bidēha bilōkahiṃ rānī. sisu sama prīti na jāti bakhānī..
jōginha parama tatvamaya bhāsā. sāṃta suddha sama sahaja prakāsā..
haribhagatanha dēkhē dōu bhrātā. iṣṭadēva iva saba sukha dātā..
rāmahi citava bhāyaom jēhi sīyā. sō sanēhu sukhu nahiṃ kathanīyā..
ura anubhavati na kahi saka sōū. kavana prakāra kahai kabi kōū..
ēhi bidhi rahā jāhi jasa bhāū. tēhiṃ tasa dēkhēu kōsalarāū..
