चौपाई
रचे रुचिर बर बंदनिबारे। मनहुँ मनोभवँ फंद सँवारे।।
मंगल कलस अनेक बनाए। ध्वज पताक पट चमर सुहाए।।
दीप मनोहर मनिमय नाना। जाइ न बरनि बिचित्र बिताना।।
जेहिं मंडप दुलहिनि बैदेही। सो बरनै असि मति कबि केही।।
दूलहु रामु रूप गुन सागर। सो बितानु तिहुँ लोक उजागर।।
जनक भवन कै सौभा जैसी। गृह गृह प्रति पुर देखिअ तैसी।।
जेहिं तेरहुति तेहि समय निहारी। तेहि लघु लगहिं भुवन दस चारी।।
जो संपदा नीच गृह सोहा। सो बिलोकि सुरनायक मोहा।।
दोहा/सोरठा
बसइ नगर जेहि लच्छ करि कपट नारि बर बेषु।।
तेहि पुर कै सोभा कहत सकुचहिं सारद सेषु।।289।।
चौपाई
पहुँचे दूत राम पुर पावन। हरषे नगर बिलोकि सुहावन।।
भूप द्वार तिन्ह खबरि जनाई। दसरथ नृप सुनि लिए बोलाई।।
करि प्रनामु तिन्ह पाती दीन्ही। मुदित महीप आपु उठि लीन्ही।।
बारि बिलोचन बाचत पाँती। पुलक गात आई भरि छाती।।
रामु लखनु उर कर बर चीठी। रहि गए कहत न खाटी मीठी।।
पुनि धरि धीर पत्रिका बाँची। हरषी सभा बात सुनि साँची।।
खेलत रहे तहाँ सुधि पाई। आए भरतु सहित हित भाई।।
पूछत अति सनेहँ सकुचाई। तात कहाँ तें पाती आई।।
दोहा/सोरठा
कुसल प्रानप्रिय बंधु दोउ अहहिं कहहु केहिं देस।
सुनि सनेह साने बचन बाची बहुरि नरेस।।290।।
चौपाई
racē rucira bara baṃdanibārē. manahuom manōbhavaom phaṃda saomvārē..
maṃgala kalasa anēka banāē. dhvaja patāka paṭa camara suhāē..
dīpa manōhara manimaya nānā. jāi na barani bicitra bitānā..
jēhiṃ maṃḍapa dulahini baidēhī. sō baranai asi mati kabi kēhī..
dūlahu rāmu rūpa guna sāgara. sō bitānu tihuom lōka ujāgara..
janaka bhavana kai saubhā jaisī. gṛha gṛha prati pura dēkhia taisī..
jēhiṃ tērahuti tēhi samaya nihārī. tēhi laghu lagahiṃ bhuvana dasa cārī..
jō saṃpadā nīca gṛha sōhā. sō bilōki suranāyaka mōhā..
चौपाई
pahuomcē dūta rāma pura pāvana. haraṣē nagara bilōki suhāvana..
bhūpa dvāra tinha khabari janāī. dasaratha nṛpa suni liē bōlāī..
kari pranāmu tinha pātī dīnhī. mudita mahīpa āpu uṭhi līnhī..
bāri bilōcana bācata pāomtī. pulaka gāta āī bhari chātī..
rāmu lakhanu ura kara bara cīṭhī. rahi gaē kahata na khāṭī mīṭhī..
puni dhari dhīra patrikā bāomcī. haraṣī sabhā bāta suni sāomcī..
khēlata rahē tahāom sudhi pāī. āē bharatu sahita hita bhāī..
pūchata ati sanēhaom sakucāī. tāta kahāom tēṃ pātī āī..
