चौपाई
जिन्ह कर नामु लेत जग माहीं। सकल अमंगल मूल नसाहीं।।
करतल होहिं पदारथ चारी। तेइ सिय रामु कहेउ कामारी।।
एहि बिधि संभु सुरन्ह समुझावा। पुनि आगें बर बसह चलावा।।
देवन्ह देखे दसरथु जाता। महामोद मन पुलकित गाता।।
साधु समाज संग महिदेवा। जनु तनु धरें करहिं सुख सेवा।।
सोहत साथ सुभग सुत चारी। जनु अपबरग सकल तनुधारी।।
मरकत कनक बरन बर जोरी। देखि सुरन्ह भै प्रीति न थोरी।।
पुनि रामहि बिलोकि हियँ हरषे। नृपहि सराहि सुमन तिन्ह बरषे।।
दोहा/सोरठा
राम रूपु नख सिख सुभग बारहिं बार निहारि।
पुलक गात लोचन सजल उमा समेत पुरारि।।315।।
चौपाई
केकि कंठ दुति स्यामल अंगा। तड़ित बिनिंदक बसन सुरंगा।।
ब्याह बिभूषन बिबिध बनाए। मंगल सब सब भाँति सुहाए।।
सरद बिमल बिधु बदनु सुहावन। नयन नवल राजीव लजावन।।
सकल अलौकिक सुंदरताई। कहि न जाइ मनहीं मन भाई।।
बंधु मनोहर सोहहिं संगा। जात नचावत चपल तुरंगा।।
राजकुअँर बर बाजि देखावहिं। बंस प्रसंसक बिरिद सुनावहिं।।
जेहि तुरंग पर रामु बिराजे। गति बिलोकि खगनायकु लाजे।।
कहि न जाइ सब भाँति सुहावा। बाजि बेषु जनु काम बनावा।।
चौपाई
jinha kara nāmu lēta jaga māhīṃ. sakala amaṃgala mūla nasāhīṃ..
karatala hōhiṃ padāratha cārī. tēi siya rāmu kahēu kāmārī..
ēhi bidhi saṃbhu suranha samujhāvā. puni āgēṃ bara basaha calāvā..
dēvanha dēkhē dasarathu jātā. mahāmōda mana pulakita gātā..
sādhu samāja saṃga mahidēvā. janu tanu dharēṃ karahiṃ sukha sēvā..
sōhata sātha subhaga suta cārī. janu apabaraga sakala tanudhārī..
marakata kanaka barana bara jōrī. dēkhi suranha bhai prīti na thōrī..
puni rāmahi bilōki hiyaom haraṣē. nṛpahi sarāhi sumana tinha baraṣē..
चौपाई
kēki kaṃṭha duti syāmala aṃgā. taḍaita biniṃdaka basana suraṃgā..
byāha bibhūṣana bibidha banāē. maṃgala saba saba bhāomti suhāē..
sarada bimala bidhu badanu suhāvana. nayana navala rājīva lajāvana..
sakala alaukika suṃdaratāī. kahi na jāi manahīṃ mana bhāī..
baṃdhu manōhara sōhahiṃ saṃgā. jāta nacāvata capala turaṃgā..
rājakuaomra bara bāji dēkhāvahiṃ. baṃsa prasaṃsaka birida sunāvahiṃ..
jēhi turaṃga para rāmu birājē. gati bilōki khaganāyaku lājē..
kahi na jāi saba bhāomti suhāvā. bāji bēṣu janu kāma banāvā..
