चौपाई
नयन नीरु हटि मंगल जानी। परिछनि करहिं मुदित मन रानी।।
बेद बिहित अरु कुल आचारू। कीन्ह भली बिधि सब ब्यवहारू।।
पंच सबद धुनि मंगल गाना। पट पाँवड़े परहिं बिधि नाना।।
करि आरती अरघु तिन्ह दीन्हा। राम गमनु मंडप तब कीन्हा।।
दसरथु सहित समाज बिराजे। बिभव बिलोकि लोकपति लाजे।।
समयँ समयँ सुर बरषहिं फूला। सांति पढ़हिं महिसुर अनुकूला।।
नभ अरु नगर कोलाहल होई। आपनि पर कछु सुनइ न कोई।।
एहि बिधि रामु मंडपहिं आए। अरघु देइ आसन बैठाए।।
चौपाई
मिले जनकु दसरथु अति प्रीतीं। करि बैदिक लौकिक सब रीतीं।।
मिलत महा दोउ राज बिराजे। उपमा खोजि खोजि कबि लाजे।।
लही न कतहुँ हारि हियँ मानी। इन्ह सम एइ उपमा उर आनी।।
सामध देखि देव अनुरागे। सुमन बरषि जसु गावन लागे।।
जगु बिरंचि उपजावा जब तें। देखे सुने ब्याह बहु तब तें।।
सकल भाँति सम साजु समाजू। सम समधी देखे हम आजू।।
देव गिरा सुनि सुंदर साँची। प्रीति अलौकिक दुहु दिसि माची।।
देत पाँवड़े अरघु सुहाए। सादर जनकु मंडपहिं ल्याए।।
चौपाई
nayana nīru haṭi maṃgala jānī. parichani karahiṃ mudita mana rānī..
bēda bihita aru kula ācārū. kīnha bhalī bidhi saba byavahārū..
paṃca sabada dhuni maṃgala gānā. paṭa pāomvaḍaē parahiṃ bidhi nānā..
kari āratī araghu tinha dīnhā. rāma gamanu maṃḍapa taba kīnhā..
dasarathu sahita samāja birājē. bibhava bilōki lōkapati lājē..
samayaom samayaom sura baraṣahiṃ phūlā. sāṃti paḍhahiṃ mahisura anukūlā..
nabha aru nagara kōlāhala hōī. āpani para kachu sunai na kōī..
ēhi bidhi rāmu maṃḍapahiṃ āē. araghu dēi āsana baiṭhāē..
चौपाई
milē janaku dasarathu ati prītīṃ. kari baidika laukika saba rītīṃ..
milata mahā dōu rāja birājē. upamā khōji khōji kabi lājē..
lahī na katahuom hāri hiyaom mānī. inha sama ēi upamā ura ānī..
sāmadha dēkhi dēva anurāgē. sumana baraṣi jasu gāvana lāgē..
jagu biraṃci upajāvā jaba tēṃ. dēkhē sunē byāha bahu taba tēṃ..
sakala bhāomti sama sāju samājū. sama samadhī dēkhē hama ājū..
dēva girā suni suṃdara sāomcī. prīti alaukika duhu disi mācī..
dēta pāomvaḍaē araghu suhāē. sādara janaku maṃḍapahiṃ lyāē..
