चौपाई
मुनि मंडलिहि जनक सिरु नावा। आसिरबादु सबहि सन पावा।।
सादर पुनि भेंटे जामाता। रूप सील गुन निधि सब भ्राता।।
जोरि पंकरुह पानि सुहाए। बोले बचन प्रेम जनु जाए।।
राम करौ केहि भाँति प्रसंसा। मुनि महेस मन मानस हंसा।।
करहिं जोग जोगी जेहि लागी। कोहु मोहु ममता मदु त्यागी।।
ब्यापकु ब्रह्मु अलखु अबिनासी। चिदानंदु निरगुन गुनरासी।।
मन समेत जेहि जान न बानी। तरकि न सकहिं सकल अनुमानी।।
महिमा निगमु नेति कहि कहई। जो तिहुँ काल एकरस रहई।।
दोहा/सोरठा
नयन बिषय मो कहुँ भयउ सो समस्त सुख मूल।
सबइ लाभु जग जीव कहँ भएँ ईसु अनुकुल।।341।।
चौपाई
सबहि भाँति मोहि दीन्हि बड़ाई। निज जन जानि लीन्ह अपनाई।।
होहिं सहस दस सारद सेषा। करहिं कलप कोटिक भरि लेखा।।
मोर भाग्य राउर गुन गाथा। कहि न सिराहिं सुनहु रघुनाथा।।
मै कछु कहउँ एक बल मोरें। तुम्ह रीझहु सनेह सुठि थोरें।।
बार बार मागउँ कर जोरें। मनु परिहरै चरन जनि भोरें।।
सुनि बर बचन प्रेम जनु पोषे। पूरनकाम रामु परितोषे।।
करि बर बिनय ससुर सनमाने। पितु कौसिक बसिष्ठ सम जाने।।
बिनती बहुरि भरत सन कीन्ही। मिलि सप्रेमु पुनि आसिष दीन्ही।।
दोहा/सोरठा
मिले लखन रिपुसूदनहि दीन्हि असीस महीस।
भए परस्पर प्रेमबस फिरि फिरि नावहिं सीस।।342।।
चौपाई
muni maṃḍalihi janaka siru nāvā. āsirabādu sabahi sana pāvā..
sādara puni bhēṃṭē jāmātā. rūpa sīla guna nidhi saba bhrātā..
jōri paṃkaruha pāni suhāē. bōlē bacana prēma janu jāē..
rāma karau kēhi bhāomti prasaṃsā. muni mahēsa mana mānasa haṃsā..
karahiṃ jōga jōgī jēhi lāgī. kōhu mōhu mamatā madu tyāgī..
byāpaku brahmu alakhu abināsī. cidānaṃdu niraguna gunarāsī..
mana samēta jēhi jāna na bānī. taraki na sakahiṃ sakala anumānī..
mahimā nigamu nēti kahi kahaī. jō tihuom kāla ēkarasa rahaī..
चौपाई
sabahi bhāomti mōhi dīnhi baḍaāī. nija jana jāni līnha apanāī..
hōhiṃ sahasa dasa sārada sēṣā. karahiṃ kalapa kōṭika bhari lēkhā..
mōra bhāgya rāura guna gāthā. kahi na sirāhiṃ sunahu raghunāthā..
mai kachu kahauom ēka bala mōrēṃ. tumha rījhahu sanēha suṭhi thōrēṃ..
bāra bāra māgauom kara jōrēṃ. manu pariharai carana jani bhōrēṃ..
suni bara bacana prēma janu pōṣē. pūranakāma rāmu paritōṣē..
kari bara binaya sasura sanamānē. pitu kausika basiṣṭha sama jānē..
binatī bahuri bharata sana kīnhī. mili saprēmu puni āsiṣa dīnhī..
