चौपाई
भूप बिलोकि लिए उर लाई। बैठै हरषि रजायसु पाई।।
देखि रामु सब सभा जुड़ानी। लोचन लाभ अवधि अनुमानी।।
पुनि बसिष्टु मुनि कौसिक आए। सुभग आसनन्हि मुनि बैठाए।।
सुतन्ह समेत पूजि पद लागे। निरखि रामु दोउ गुर अनुरागे।।
कहहिं बसिष्टु धरम इतिहासा। सुनहिं महीसु सहित रनिवासा।।
मुनि मन अगम गाधिसुत करनी। मुदित बसिष्ट बिपुल बिधि बरनी।।
बोले बामदेउ सब साँची। कीरति कलित लोक तिहुँ माची।।
सुनि आनंदु भयउ सब काहू। राम लखन उर अधिक उछाहू।।
दोहा/सोरठा
मंगल मोद उछाह नित जाहिं दिवस एहि भाँति।
उमगी अवध अनंद भरि अधिक अधिक अधिकाति।।359।।
चौपाई
सुदिन सोधि कल कंकन छौरे। मंगल मोद बिनोद न थोरे।।
नित नव सुखु सुर देखि सिहाहीं। अवध जन्म जाचहिं बिधि पाहीं।।
बिस्वामित्रु चलन नित चहहीं। राम सप्रेम बिनय बस रहहीं।।
दिन दिन सयगुन भूपति भाऊ। देखि सराह महामुनिराऊ।।
मागत बिदा राउ अनुरागे। सुतन्ह समेत ठाढ़ भे आगे।।
नाथ सकल संपदा तुम्हारी। मैं सेवकु समेत सुत नारी।।
करब सदा लरिकनः पर छोहू। दरसन देत रहब मुनि मोहू।।
अस कहि राउ सहित सुत रानी। परेउ चरन मुख आव न बानी।।
दीन्ह असीस बिप्र बहु भाँती। चले न प्रीति रीति कहि जाती।।
रामु सप्रेम संग सब भाई। आयसु पाइ फिरे पहुँचाई।।
दोहा/सोरठा
राम रूपु भूपति भगति ब्याहु उछाहु अनंदु।
जात सराहत मनहिं मन मुदित गाधिकुलचंदु।।360।।
चौपाई
bhūpa bilōki liē ura lāī. baiṭhai haraṣi rajāyasu pāī..
dēkhi rāmu saba sabhā juḍaānī. lōcana lābha avadhi anumānī..
puni basiṣṭu muni kausika āē. subhaga āsananhi muni baiṭhāē..
sutanha samēta pūji pada lāgē. nirakhi rāmu dōu gura anurāgē..
kahahiṃ basiṣṭu dharama itihāsā. sunahiṃ mahīsu sahita ranivāsā..
muni mana agama gādhisuta karanī. mudita basiṣṭa bipula bidhi baranī..
bōlē bāmadēu saba sāomcī. kīrati kalita lōka tihuom mācī..
suni ānaṃdu bhayau saba kāhū. rāma lakhana ura adhika uchāhū..
चौपाई
sudina sōdhi kala kaṃkana chaurē. maṃgala mōda binōda na thōrē..
nita nava sukhu sura dēkhi sihāhīṃ. avadha janma jācahiṃ bidhi pāhīṃ..
bisvāmitru calana nita cahahīṃ. rāma saprēma binaya basa rahahīṃ..
dina dina sayaguna bhūpati bhāū. dēkhi sarāha mahāmunirāū..
māgata bidā rāu anurāgē. sutanha samēta ṭhāḍha bhē āgē..
nātha sakala saṃpadā tumhārī. maiṃ sēvaku samēta suta nārī..
karaba sadā larikanaḥ para chōhū. darasana dēta rahaba muni mōhū..
asa kahi rāu sahita suta rānī. parēu carana mukha āva na bānī..
dīnha asīsa bipra bahu bhāomtī. calē na prīti rīti kahi jātī..
rāmu saprēma saṃga saba bhāī. āyasu pāi phirē pahuomcāī..
