चौपाई
जौं अनीह ब्यापक बिभु कोऊ। कबहु बुझाइ नाथ मोहि सोऊ।।
अग्य जानि रिस उर जनि धरहू। जेहि बिधि मोह मिटै सोइ करहू।।
मै बन दीखि राम प्रभुताई। अति भय बिकल न तुम्हहि सुनाई।।
तदपि मलिन मन बोधु न आवा। सो फलु भली भाँति हम पावा।।
अजहूँ कछु संसउ मन मोरे। करहु कृपा बिनवउँ कर जोरें।।
प्रभु तब मोहि बहु भाँति प्रबोधा। नाथ सो समुझि करहु जनि क्रोधा।।
तब कर अस बिमोह अब नाहीं। रामकथा पर रुचि मन माहीं।।
कहहु पुनीत राम गुन गाथा। भुजगराज भूषन सुरनाथा।।
दोहा/सोरठा
बंदउ पद धरि धरनि सिरु बिनय करउँ कर जोरि।
बरनहु रघुबर बिसद जसु श्रुति सिद्धांत निचोरि।।109।।
चौपाई
जदपि जोषिता नहिं अधिकारी। दासी मन क्रम बचन तुम्हारी।।
गूढ़उ तत्व न साधु दुरावहिं। आरत अधिकारी जहँ पावहिं।।
अति आरति पूछउँ सुरराया। रघुपति कथा कहहु करि दाया।।
प्रथम सो कारन कहहु बिचारी। निर्गुन ब्रह्म सगुन बपु धारी।।
पुनि प्रभु कहहु राम अवतारा। बालचरित पुनि कहहु उदारा।।
कहहु जथा जानकी बिबाहीं। राज तजा सो दूषन काहीं।।
बन बसि कीन्हे चरित अपारा। कहहु नाथ जिमि रावन मारा।।
राज बैठि कीन्हीं बहु लीला। सकल कहहु संकर सुखलीला।।
दोहा/सोरठा
बहुरि कहहु करुनायतन कीन्ह जो अचरज राम।
प्रजा सहित रघुबंसमनि किमि गवने निज धाम।।110।।
चौपाई
jauṃ anīha byāpaka bibhu kōū. kabahu bujhāi nātha mōhi sōū..
agya jāni risa ura jani dharahū. jēhi bidhi mōha miṭai sōi karahū..
mai bana dīkhi rāma prabhutāī. ati bhaya bikala na tumhahi sunāī..
tadapi malina mana bōdhu na āvā. sō phalu bhalī bhāomti hama pāvā..
ajahūom kachu saṃsau mana mōrē. karahu kṛpā binavauom kara jōrēṃ..
prabhu taba mōhi bahu bhāomti prabōdhā. nātha sō samujhi karahu jani krōdhā..
taba kara asa bimōha aba nāhīṃ. rāmakathā para ruci mana māhīṃ..
kahahu punīta rāma guna gāthā. bhujagarāja bhūṣana suranāthā..
चौपाई
jadapi jōṣitā nahiṃ adhikārī. dāsī mana krama bacana tumhārī..
gūḍhau tatva na sādhu durāvahiṃ. ārata adhikārī jahaom pāvahiṃ..
ati ārati pūchauom surarāyā. raghupati kathā kahahu kari dāyā..
prathama sō kārana kahahu bicārī. nirguna brahma saguna bapu dhārī..
puni prabhu kahahu rāma avatārā. bālacarita puni kahahu udārā..
kahahu jathā jānakī bibāhīṃ. rāja tajā sō dūṣana kāhīṃ..
bana basi kīnhē carita apārā. kahahu nātha jimi rāvana mārā..
rāja baiṭhi kīnhīṃ bahu līlā. sakala kahahu saṃkara sukhalīlā..
