चौपाई
हिमगिरि गुहा एक अति पावनि। बह समीप सुरसरी सुहावनि।।
आश्रम परम पुनीत सुहावा। देखि देवरिषि मन अति भावा।।
निरखि सैल सरि बिपिन बिभागा। भयउ रमापति पद अनुरागा।।
सुमिरत हरिहि श्राप गति बाधी। सहज बिमल मन लागि समाधी।।
मुनि गति देखि सुरेस डेराना। कामहि बोलि कीन्ह सनमाना।।
सहित सहाय जाहु मम हेतू। चकेउ हरषि हियँ जलचरकेतू।।
सुनासीर मन महुँ असि त्रासा। चहत देवरिषि मम पुर बासा।।
जे कामी लोलुप जग माहीं। कुटिल काक इव सबहि डेराहीं।।
दोहा/सोरठा
सुख हाड़ लै भाग सठ स्वान निरखि मृगराज।
छीनि लेइ जनि जान जड़ तिमि सुरपतिहि न लाज।।125।।
चौपाई
तेहि आश्रमहिं मदन जब गयऊ। निज मायाँ बसंत निरमयऊ।।
कुसुमित बिबिध बिटप बहुरंगा। कूजहिं कोकिल गुंजहि भृंगा।।
चली सुहावनि त्रिबिध बयारी। काम कृसानु बढ़ावनिहारी।।
रंभादिक सुरनारि नबीना । सकल असमसर कला प्रबीना।।
करहिं गान बहु तान तरंगा। बहुबिधि क्रीड़हि पानि पतंगा।।
देखि सहाय मदन हरषाना। कीन्हेसि पुनि प्रपंच बिधि नाना।।
काम कला कछु मुनिहि न ब्यापी। निज भयँ डरेउ मनोभव पापी।।
सीम कि चाँपि सकइ कोउ तासु। बड़ रखवार रमापति जासू।।
दोहा/सोरठा
सहित सहाय सभीत अति मानि हारि मन मैन।
गहेसि जाइ मुनि चरन तब कहि सुठि आरत बैन।।126।।
चौपाई
himagiri guhā ēka ati pāvani. baha samīpa surasarī suhāvani..
āśrama parama punīta suhāvā. dēkhi dēvariṣi mana ati bhāvā..
nirakhi saila sari bipina bibhāgā. bhayau ramāpati pada anurāgā..
sumirata harihi śrāpa gati bādhī. sahaja bimala mana lāgi samādhī..
muni gati dēkhi surēsa ḍērānā. kāmahi bōli kīnha sanamānā..
sahita sahāya jāhu mama hētū. cakēu haraṣi hiyaom jalacarakētū..
sunāsīra mana mahuom asi trāsā. cahata dēvariṣi mama pura bāsā..
jē kāmī lōlupa jaga māhīṃ. kuṭila kāka iva sabahi ḍērāhīṃ..
दोहा/सोरठा
sukha hāḍa lai bhāga saṭha svāna nirakhi mṛgarāja.
chīni lēi jani jāna jaḍa timi surapatihi na lāja..125..
चौपाई
tēhi āśramahiṃ madana jaba gayaū. nija māyāom basaṃta niramayaū..
kusumita bibidha biṭapa bahuraṃgā. kūjahiṃ kōkila guṃjahi bhṛṃgā..
calī suhāvani tribidha bayārī. kāma kṛsānu baḍhaāvanihārī..
raṃbhādika suranāri nabīnā . sakala asamasara kalā prabīnā..
karahiṃ gāna bahu tāna taraṃgā. bahubidhi krīḍahi pāni pataṃgā..
dēkhi sahāya madana haraṣānā. kīnhēsi puni prapaṃca bidhi nānā..
kāma kalā kachu munihi na byāpī. nija bhayaom ḍarēu manōbhava pāpī..
sīma ki cāompi sakai kōu tāsu. baḍa rakhavāra ramāpati jāsū..
