चौपाई
अपर हेतु सुनु सैलकुमारी। कहउँ बिचित्र कथा बिस्तारी।।
जेहि कारन अज अगुन अरूपा। ब्रह्म भयउ कोसलपुर भूपा।।
जो प्रभु बिपिन फिरत तुम्ह देखा। बंधु समेत धरें मुनिबेषा।।
जासु चरित अवलोकि भवानी। सती सरीर रहिहु बौरानी।।
अजहुँ न छाया मिटति तुम्हारी। तासु चरित सुनु भ्रम रुज हारी।।
लीला कीन्हि जो तेहिं अवतारा। सो सब कहिहउँ मति अनुसारा।।
भरद्वाज सुनि संकर बानी। सकुचि सप्रेम उमा मुसकानी।।
लगे बहुरि बरने बृषकेतू। सो अवतार भयउ जेहि हेतू।।
दोहा/सोरठा
सो मैं तुम्ह सन कहउँ सबु सुनु मुनीस मन लाई।।
राम कथा कलि मल हरनि मंगल करनि सुहाइ।।141।।
चौपाई
स्वायंभू मनु अरु सतरूपा। जिन्ह तें भै नरसृष्टि अनूपा।।
दंपति धरम आचरन नीका। अजहुँ गाव श्रुति जिन्ह कै लीका।।
नृप उत्तानपाद सुत तासू। ध्रुव हरि भगत भयउ सुत जासू।।
लघु सुत नाम प्रिय्रब्रत ताही। बेद पुरान प्रसंसहि जाही।।
देवहूति पुनि तासु कुमारी। जो मुनि कर्दम कै प्रिय नारी।।
आदिदेव प्रभु दीनदयाला। जठर धरेउ जेहिं कपिल कृपाला।।
सांख्य सास्त्र जिन्ह प्रगट बखाना। तत्व बिचार निपुन भगवाना।।
तेहिं मनु राज कीन्ह बहु काला। प्रभु आयसु सब बिधि प्रतिपाला।।
दोहा/सोरठा
होइ न बिषय बिराग भवन बसत भा चौथपन।
हृदयँ बहुत दुख लाग जनम गयउ हरिभगति बिनु।।142।।
चौपाई
apara hētu sunu sailakumārī. kahauom bicitra kathā bistārī..
jēhi kārana aja aguna arūpā. brahma bhayau kōsalapura bhūpā..
jō prabhu bipina phirata tumha dēkhā. baṃdhu samēta dharēṃ munibēṣā..
jāsu carita avalōki bhavānī. satī sarīra rahihu baurānī..
ajahuom na chāyā miṭati tumhārī. tāsu carita sunu bhrama ruja hārī..
līlā kīnhi jō tēhiṃ avatārā. sō saba kahihauom mati anusārā..
bharadvāja suni saṃkara bānī. sakuci saprēma umā musakānī..
lagē bahuri baranē bṛṣakētū. sō avatāra bhayau jēhi hētū..
चौपाई
svāyaṃbhū manu aru satarūpā. jinha tēṃ bhai narasṛṣṭi anūpā..
daṃpati dharama ācarana nīkā. ajahuom gāva śruti jinha kai līkā..
nṛpa uttānapāda suta tāsū. dhruva hari bhagata bhayau suta jāsū..
laghu suta nāma priyrabrata tāhī. bēda purāna prasaṃsahi jāhī..
dēvahūti puni tāsu kumārī. jō muni kardama kai priya nārī..
ādidēva prabhu dīnadayālā. jaṭhara dharēu jēhiṃ kapila kṛpālā..
sāṃkhya sāstra jinha pragaṭa bakhānā. tatva bicāra nipuna bhagavānā..
tēhiṃ manu rāja kīnha bahu kālā. prabhu āyasu saba bidhi pratipālā..
