चौपाई
कीन्ह बिबिध तप तीनिहुँ भाई। परम उग्र नहिं बरनि सो जाई।।
गयउ निकट तप देखि बिधाता। मागहु बर प्रसन्न मैं ताता।।
करि बिनती पद गहि दससीसा। बोलेउ बचन सुनहु जगदीसा।।
हम काहू के मरहिं न मारें। बानर मनुज जाति दुइ बारें।।
एवमस्तु तुम्ह बड़ तप कीन्हा। मैं ब्रह्माँ मिलि तेहि बर दीन्हा।।
पुनि प्रभु कुंभकरन पहिं गयऊ। तेहि बिलोकि मन बिसमय भयऊ।।
जौं एहिं खल नित करब अहारू। होइहि सब उजारि संसारू।।
सारद प्रेरि तासु मति फेरी। मागेसि नीद मास षट केरी।।
दोहा/सोरठा
गए बिभीषन पास पुनि कहेउ पुत्र बर मागु।
तेहिं मागेउ भगवंत पद कमल अमल अनुरागु।।177।।
चौपाई
तिन्हि देइ बर ब्रह्म सिधाए। हरषित ते अपने गृह आए।।
मय तनुजा मंदोदरि नामा। परम सुंदरी नारि ललामा।।
सोइ मयँ दीन्हि रावनहि आनी। होइहि जातुधानपति जानी।।
हरषित भयउ नारि भलि पाई। पुनि दोउ बंधु बिआहेसि जाई।।
गिरि त्रिकूट एक सिंधु मझारी। बिधि निर्मित दुर्गम अति भारी।।
सोइ मय दानवँ बहुरि सँवारा। कनक रचित मनिभवन अपारा।।
भोगावति जसि अहिकुल बासा। अमरावति जसि सक्रनिवासा।।
तिन्ह तें अधिक रम्य अति बंका। जग बिख्यात नाम तेहि लंका।।
दोहा/सोरठा
खाईं सिंधु गभीर अति चारिहुँ दिसि फिरि आव।
कनक कोट मनि खचित दृढ़ बरनि न जाइ बनाव।।178(क)।।
हरिप्रेरित जेहिं कलप जोइ जातुधानपति होइ।
सूर प्रतापी अतुलबल दल समेत बस सोइ।।178(ख)।।
चौपाई
kīnha bibidha tapa tīnihuom bhāī. parama ugra nahiṃ barani sō jāī..
gayau nikaṭa tapa dēkhi bidhātā. māgahu bara prasanna maiṃ tātā..
kari binatī pada gahi dasasīsā. bōlēu bacana sunahu jagadīsā..
hama kāhū kē marahiṃ na mārēṃ. bānara manuja jāti dui bārēṃ..
ēvamastu tumha baḍa tapa kīnhā. maiṃ brahmāom mili tēhi bara dīnhā..
puni prabhu kuṃbhakarana pahiṃ gayaū. tēhi bilōki mana bisamaya bhayaū..
jauṃ ēhiṃ khala nita karaba ahārū. hōihi saba ujāri saṃsārū..
sārada prēri tāsu mati phērī. māgēsi nīda māsa ṣaṭa kērī..
चौपाई
tinhi dēi bara brahma sidhāē. haraṣita tē apanē gṛha āē..
maya tanujā maṃdōdari nāmā. parama suṃdarī nāri lalāmā..
sōi mayaom dīnhi rāvanahi ānī. hōihi jātudhānapati jānī..
haraṣita bhayau nāri bhali pāī. puni dōu baṃdhu biāhēsi jāī..
giri trikūṭa ēka siṃdhu majhārī. bidhi nirmita durgama ati bhārī..
sōi maya dānavaom bahuri saomvārā. kanaka racita manibhavana apārā..
bhōgāvati jasi ahikula bāsā. amarāvati jasi sakranivāsā..
tinha tēṃ adhika ramya ati baṃkā. jaga bikhyāta nāma tēhi laṃkā..
