चौपाई
प्रनवउँ परिजन सहित बिदेहू। जाहि राम पद गूढ़ सनेहू।।
जोग भोग महँ राखेउ गोई। राम बिलोकत प्रगटेउ सोई।।
प्रनवउँ प्रथम भरत के चरना। जासु नेम ब्रत जाइ न बरना।।
राम चरन पंकज मन जासू। लुबुध मधुप इव तजइ न पासू।।
बंदउँ लछिमन पद जलजाता। सीतल सुभग भगत सुख दाता।।
रघुपति कीरति बिमल पताका। दंड समान भयउ जस जाका।।
सेष सहस्त्रसीस जग कारन। जो अवतरेउ भूमि भय टारन।।
सदा सो सानुकूल रह मो पर। कृपासिंधु सौमित्रि गुनाकर।।
रिपुसूदन पद कमल नमामी। सूर सुसील भरत अनुगामी।।
महावीर बिनवउँ हनुमाना। राम जासु जस आप बखाना।।
दोहा/सोरठा
प्रनवउँ पवनकुमार खल बन पावक ग्यानधन।
जासु हृदय आगार बसहिं राम सर चाप धर।।17।।
चौपाई
कपिपति रीछ निसाचर राजा। अंगदादि जे कीस समाजा।।
बंदउँ सब के चरन सुहाए। अधम सरीर राम जिन्ह पाए।।
रघुपति चरन उपासक जेते। खग मृग सुर नर असुर समेते।।
बंदउँ पद सरोज सब केरे। जे बिनु काम राम के चेरे।।
सुक सनकादि भगत मुनि नारद। जे मुनिबर बिग्यान बिसारद।।
प्रनवउँ सबहिं धरनि धरि सीसा। करहु कृपा जन जानि मुनीसा।।
जनकसुता जग जननि जानकी। अतिसय प्रिय करुना निधान की।।
ताके जुग पद कमल मनावउँ। जासु कृपाँ निरमल मति पावउँ।।
पुनि मन बचन कर्म रघुनायक। चरन कमल बंदउँ सब लायक।।
राजिवनयन धरें धनु सायक। भगत बिपति भंजन सुख दायक।।
दोहा/सोरठा
गिरा अरथ जल बीचि सम कहिअत भिन्न न भिन्न।
बदउँ सीता राम पद जिन्हहि परम प्रिय खिन्न।।18।।
चौपाई
pranavauom parijana sahita bidēhū. jāhi rāma pada gūḍha sanēhū..
jōga bhōga mahaom rākhēu gōī. rāma bilōkata pragaṭēu sōī..
pranavauom prathama bharata kē caranā. jāsu nēma brata jāi na baranā..
rāma carana paṃkaja mana jāsū. lubudha madhupa iva tajai na pāsū..
baṃdauom lachimana pada jalajātā. sītala subhaga bhagata sukha dātā..
raghupati kīrati bimala patākā. daṃḍa samāna bhayau jasa jākā..
sēṣa sahastrasīsa jaga kārana. jō avatarēu bhūmi bhaya ṭārana..
sadā sō sānukūla raha mō para. kṛpāsiṃdhu saumitri gunākara..
ripusūdana pada kamala namāmī. sūra susīla bharata anugāmī..
mahāvīra binavauom hanumānā. rāma jāsu jasa āpa bakhānā..
चौपाई
kapipati rīcha nisācara rājā. aṃgadādi jē kīsa samājā..
baṃdauom saba kē carana suhāē. adhama sarīra rāma jinha pāē..
raghupati carana upāsaka jētē. khaga mṛga sura nara asura samētē..
baṃdauom pada sarōja saba kērē. jē binu kāma rāma kē cērē..
suka sanakādi bhagata muni nārada. jē munibara bigyāna bisārada..
pranavauom sabahiṃ dharani dhari sīsā. karahu kṛpā jana jāni munīsā..
janakasutā jaga janani jānakī. atisaya priya karunā nidhāna kī..
tākē juga pada kamala manāvauom. jāsu kṛpāom niramala mati pāvauom..
puni mana bacana karma raghunāyaka. carana kamala baṃdauom saba lāyaka..
rājivanayana dharēṃ dhanu sāyaka. bhagata bipati bhaṃjana sukha dāyaka..
