चौपाई
नौमी तिथि मधु मास पुनीता। सुकल पच्छ अभिजित हरिप्रीता।।
मध्यदिवस अति सीत न घामा। पावन काल लोक बिश्रामा।।
सीतल मंद सुरभि बह बाऊ। हरषित सुर संतन मन चाऊ।।
बन कुसुमित गिरिगन मनिआरा। स्त्रवहिं सकल सरिताऽमृतधारा।।
सो अवसर बिरंचि जब जाना। चले सकल सुर साजि बिमाना।।
गगन बिमल सकुल सुर जूथा। गावहिं गुन गंधर्ब बरूथा।।
बरषहिं सुमन सुअंजलि साजी। गहगहि गगन दुंदुभी बाजी।।
अस्तुति करहिं नाग मुनि देवा। बहुबिधि लावहिं निज निज सेवा।।
दोहा/सोरठा
सुर समूह बिनती करि पहुँचे निज निज धाम।
जगनिवास प्रभु प्रगटे अखिल लोक बिश्राम।।191।।
छंद
भए प्रगट कृपाला दीनदयाला कौसल्या हितकारी।
हरषित महतारी मुनि मन हारी अद्भुत रूप बिचारी।।
लोचन अभिरामा तनु घनस्यामा निज आयुध भुज चारी।
भूषन बनमाला नयन बिसाला सोभासिंधु खरारी।।
कह दुइ कर जोरी अस्तुति तोरी केहि बिधि करौं अनंता।
माया गुन ग्यानातीत अमाना बेद पुरान भनंता।।
करुना सुख सागर सब गुन आगर जेहि गावहिं श्रुति संता।
सो मम हित लागी जन अनुरागी भयउ प्रगट श्रीकंता।।
ब्रह्मांड निकाया निर्मित माया रोम रोम प्रति बेद कहै।
मम उर सो बासी यह उपहासी सुनत धीर पति थिर न रहै।।
उपजा जब ग्याना प्रभु मुसकाना चरित बहुत बिधि कीन्ह चहै।
कहि कथा सुहाई मातु बुझाई जेहि प्रकार सुत प्रेम लहै।।
माता पुनि बोली सो मति डौली तजहु तात यह रूपा।
कीजै सिसुलीला अति प्रियसीला यह सुख परम अनूपा।।
सुनि बचन सुजाना रोदन ठाना होइ बालक सुरभूपा।
यह चरित जे गावहिं हरिपद पावहिं ते न परहिं भवकूपा।।
चौपाई
naumī tithi madhu māsa punītā. sukala paccha abhijita hariprītā..
madhyadivasa ati sīta na ghāmā. pāvana kāla lōka biśrāmā..
sītala maṃda surabhi baha bāū. haraṣita sura saṃtana mana cāū..
bana kusumita girigana maniārā. stravahiṃ sakala saritā.mṛtadhārā..
sō avasara biraṃci jaba jānā. calē sakala sura sāji bimānā..
gagana bimala sakula sura jūthā. gāvahiṃ guna gaṃdharba barūthā..
baraṣahiṃ sumana suaṃjali sājī. gahagahi gagana duṃdubhī bājī..
astuti karahiṃ nāga muni dēvā. bahubidhi lāvahiṃ nija nija sēvā..
छंद
bhaē pragaṭa kṛpālā dīnadayālā kausalyā hitakārī.
haraṣita mahatārī muni mana hārī adbhuta rūpa bicārī..
lōcana abhirāmā tanu ghanasyāmā nija āyudha bhuja cārī.
bhūṣana banamālā nayana bisālā sōbhāsiṃdhu kharārī..
kaha dui kara jōrī astuti tōrī kēhi bidhi karauṃ anaṃtā.
māyā guna gyānātīta amānā bēda purāna bhanaṃtā..
karunā sukha sāgara saba guna āgara jēhi gāvahiṃ śruti saṃtā.
sō mama hita lāgī jana anurāgī bhayau pragaṭa śrīkaṃtā..
brahmāṃḍa nikāyā nirmita māyā rōma rōma prati bēda kahai.
mama ura sō bāsī yaha upahāsī sunata dhīra pati thira na rahai..
upajā jaba gyānā prabhu musakānā carita bahuta bidhi kīnha cahai.
kahi kathā suhāī mātu bujhāī jēhi prakāra suta prēma lahai..
mātā puni bōlī sō mati ḍaulī tajahu tāta yaha rūpā.
kījai sisulīlā ati priyasīlā yaha sukha parama anūpā..
suni bacana sujānā rōdana ṭhānā hōi bālaka surabhūpā.
yaha carita jē gāvahiṃ haripada pāvahiṃ tē na parahiṃ bhavakūpā..
