चौपाई
परेउ मुरुछि महि लागत सायक। सुमिरत राम राम रघुनायक।।
सुनि प्रिय बचन भरत तब धाए। कपि समीप अति आतुर आए।।
बिकल बिलोकि कीस उर लावा। जागत नहिं बहु भाँति जगावा।।
मुख मलीन मन भए दुखारी। कहत बचन भरि लोचन बारी।।
जेहिं बिधि राम बिमुख मोहि कीन्हा। तेहिं पुनि यह दारुन दुख दीन्हा।।
जौं मोरें मन बच अरु काया। प्रीति राम पद कमल अमाया।।
तौ कपि होउ बिगत श्रम सूला। जौं मो पर रघुपति अनुकूला।।
सुनत बचन उठि बैठ कपीसा। कहि जय जयति कोसलाधीसा।।
दोहा/सोरठा
लीन्ह कपिहि उर लाइ पुलकित तनु लोचन सजल।
प्रीति न हृदयँ समाइ सुमिरि राम रघुकुल तिलक।।59।।
चौपाई
तात कुसल कहु सुखनिधान की। सहित अनुज अरु मातु जानकी।।
कपि सब चरित समास बखाने। भए दुखी मन महुँ पछिताने।।
अहह दैव मैं कत जग जायउँ। प्रभु के एकहु काज न आयउँ।।
जानि कुअवसरु मन धरि धीरा। पुनि कपि सन बोले बलबीरा।।
तात गहरु होइहि तोहि जाता। काजु नसाइहि होत प्रभाता।।
चढ़ु मम सायक सैल समेता। पठवौं तोहि जहँ कृपानिकेता।।
सुनि कपि मन उपजा अभिमाना। मोरें भार चलिहि किमि बाना।।
राम प्रभाव बिचारि बहोरी। बंदि चरन कह कपि कर जोरी।।
दोहा/सोरठा
तव प्रताप उर राखि प्रभु जेहउँ नाथ तुरंत।
अस कहि आयसु पाइ पद बंदि चलेउ हनुमंत।।60(क)।।
भरत बाहु बल सील गुन प्रभु पद प्रीति अपार।
मन महुँ जात सराहत पुनि पुनि पवनकुमार।।60(ख)।।
चौपाई
parēu muruchi mahi lāgata sāyaka. sumirata rāma rāma raghunāyaka..
suni priya bacana bharata taba dhāē. kapi samīpa ati ātura āē..
bikala bilōki kīsa ura lāvā. jāgata nahiṃ bahu bhāomti jagāvā..
mukha malīna mana bhaē dukhārī. kahata bacana bhari lōcana bārī..
jēhiṃ bidhi rāma bimukha mōhi kīnhā. tēhiṃ puni yaha dāruna dukha dīnhā..
jauṃ mōrēṃ mana baca aru kāyā. prīti rāma pada kamala amāyā..
tau kapi hōu bigata śrama sūlā. jauṃ mō para raghupati anukūlā..
sunata bacana uṭhi baiṭha kapīsā. kahi jaya jayati kōsalādhīsā..
चौपाई
tāta kusala kahu sukhanidhāna kī. sahita anuja aru mātu jānakī..
kapi saba carita samāsa bakhānē. bhaē dukhī mana mahuom pachitānē..
ahaha daiva maiṃ kata jaga jāyauom. prabhu kē ēkahu kāja na āyauom..
jāni kuavasaru mana dhari dhīrā. puni kapi sana bōlē balabīrā..
tāta gaharu hōihi tōhi jātā. kāju nasāihi hōta prabhātā..
caḍhau mama sāyaka saila samētā. paṭhavauṃ tōhi jahaom kṛpānikētā..
suni kapi mana upajā abhimānā. mōrēṃ bhāra calihi kimi bānā..
rāma prabhāva bicāri bahōrī. baṃdi carana kaha kapi kara jōrī..
