चौपाई
सभय देव करुनानिधि जान्यो। श्रवन प्रजंत सरासनु तान्यो।।
बिसिख निकर निसिचर मुख भरेऊ। तदपि महाबल भूमि न परेऊ।।
सरन्हि भरा मुख सन्मुख धावा। काल त्रोन सजीव जनु आवा।।
तब प्रभु कोपि तीब्र सर लीन्हा। धर ते भिन्न तासु सिर कीन्हा।।
सो सिर परेउ दसानन आगें। बिकल भयउ जिमि फनि मनि त्यागें।।
धरनि धसइ धर धाव प्रचंडा। तब प्रभु काटि कीन्ह दुइ खंडा।।
परे भूमि जिमि नभ तें भूधर। हेठ दाबि कपि भालु निसाचर।।
तासु तेज प्रभु बदन समाना। सुर मुनि सबहिं अचंभव माना।।
सुर दुंदुभीं बजावहिं हरषहिं। अस्तुति करहिं सुमन बहु बरषहिं।।
करि बिनती सुर सकल सिधाए। तेही समय देवरिषि आए।।
गगनोपरि हरि गुन गन गाए। रुचिर बीररस प्रभु मन भाए।।
बेगि हतहु खल कहि मुनि गए। राम समर महि सोभत भए।।
चौपाई
दिन कें अंत फिरीं दोउ अनी। समर भई सुभटन्ह श्रम घनी।।
राम कृपाँ कपि दल बल बाढ़ा। जिमि तृन पाइ लाग अति डाढ़ा।।
छीजहिं निसिचर दिनु अरु राती। निज मुख कहें सुकृत जेहि भाँती।।
बहु बिलाप दसकंधर करई। बंधु सीस पुनि पुनि उर धरई।।
रोवहिं नारि हृदय हति पानी। तासु तेज बल बिपुल बखानी।।
मेघनाद तेहि अवसर आयउ। कहि बहु कथा पिता समुझायउ।।
देखेहु कालि मोरि मनुसाई। अबहिं बहुत का करौं बड़ाई।।
इष्टदेव सैं बल रथ पायउँ। सो बल तात न तोहि देखायउँ।।
एहि बिधि जल्पत भयउ बिहाना। चहुँ दुआर लागे कपि नाना।।
इत कपि भालु काल सम बीरा। उत रजनीचर अति रनधीरा।।
लरहिं सुभट निज निज जय हेतू। बरनि न जाइ समर खगकेतू।।
दोहा/सोरठा
मेघनाद मायामय रथ चढ़ि गयउ अकास।।
गर्जेउ अट्टहास करि भइ कपि कटकहि त्रास।।72।।
चौपाई
sabhaya dēva karunānidhi jānyō. śravana prajaṃta sarāsanu tānyō..
bisikha nikara nisicara mukha bharēū. tadapi mahābala bhūmi na parēū..
saranhi bharā mukha sanmukha dhāvā. kāla trōna sajīva janu āvā..
taba prabhu kōpi tībra sara līnhā. dhara tē bhinna tāsu sira kīnhā..
sō sira parēu dasānana āgēṃ. bikala bhayau jimi phani mani tyāgēṃ..
dharani dhasai dhara dhāva pracaṃḍā. taba prabhu kāṭi kīnha dui khaṃḍā..
parē bhūmi jimi nabha tēṃ bhūdhara. hēṭha dābi kapi bhālu nisācara..
tāsu tēja prabhu badana samānā. sura muni sabahiṃ acaṃbhava mānā..
sura duṃdubhīṃ bajāvahiṃ haraṣahiṃ. astuti karahiṃ sumana bahu baraṣahiṃ..
kari binatī sura sakala sidhāē. tēhī samaya dēvariṣi āē..
gaganōpari hari guna gana gāē. rucira bīrarasa prabhu mana bhāē..
bēgi hatahu khala kahi muni gaē. rāma samara mahi sōbhata bhaē..
चौपाई
dina kēṃ aṃta phirīṃ dōu anī. samara bhaī subhaṭanha śrama ghanī..
rāma kṛpāom kapi dala bala bāḍhaā. jimi tṛna pāi lāga ati ḍāḍhaā..
chījahiṃ nisicara dinu aru rātī. nija mukha kahēṃ sukṛta jēhi bhāomtī..
bahu bilāpa dasakaṃdhara karaī. baṃdhu sīsa puni puni ura dharaī..
rōvahiṃ nāri hṛdaya hati pānī. tāsu tēja bala bipula bakhānī..
mēghanāda tēhi avasara āyau. kahi bahu kathā pitā samujhāyau..
dēkhēhu kāli mōri manusāī. abahiṃ bahuta kā karauṃ baḍaāī..
iṣṭadēva saiṃ bala ratha pāyauom. sō bala tāta na tōhi dēkhāyauom..
ēhi bidhi jalpata bhayau bihānā. cahuom duāra lāgē kapi nānā..
ita kapi bhālu kāla sama bīrā. uta rajanīcara ati ranadhīrā..
larahiṃ subhaṭa nija nija jaya hētū. barani na jāi samara khagakētū..
