चौपाई
सक्ति सूल तरवारि कृपाना। अस्त्र सस्त्र कुलिसायुध नाना।।
डारह परसु परिघ पाषाना। लागेउ बृष्टि करै बहु बाना।।
दस दिसि रहे बान नभ छाई। मानहुँ मघा मेघ झरि लाई।।
धरु धरु मारु सुनिअ धुनि काना। जो मारइ तेहि कोउ न जाना।।
गहि गिरि तरु अकास कपि धावहिं। देखहि तेहि न दुखित फिरि आवहिं।।
अवघट घाट बाट गिरि कंदर। माया बल कीन्हेसि सर पंजर।।
जाहिं कहाँ ब्याकुल भए बंदर। सुरपति बंदि परे जनु मंदर।।
मारुतसुत अंगद नल नीला। कीन्हेसि बिकल सकल बलसीला।।
पुनि लछिमन सुग्रीव बिभीषन। सरन्हि मारि कीन्हेसि जर्जर तन।।
पुनि रघुपति सैं जूझे लागा। सर छाँड़इ होइ लागहिं नागा।।
ब्याल पास बस भए खरारी। स्वबस अनंत एक अबिकारी।।
नट इव कपट चरित कर नाना। सदा स्वतंत्र एक भगवाना।।
रन सोभा लगि प्रभुहिं बँधायो। नागपास देवन्ह भय पायो।।
दोहा/सोरठा
गिरिजा जासु नाम जपि मुनि काटहिं भव पास।
सो कि बंध तर आवइ ब्यापक बिस्व निवास।।73।।
चौपाई
चरित राम के सगुन भवानी। तर्कि न जाहिं बुद्धि बल बानी।।
अस बिचारि जे तग्य बिरागी। रामहि भजहिं तर्क सब त्यागी।।
ब्याकुल कटकु कीन्ह घननादा। पुनि भा प्रगट कहइ दुर्बादा।।
जामवंत कह खल रहु ठाढ़ा। सुनि करि ताहि क्रोध अति बाढ़ा।।
बूढ़ जानि सठ छाँड़ेउँ तोही। लागेसि अधम पचारै मोही।।
अस कहि तरल त्रिसूल चलायो। जामवंत कर गहि सोइ धायो।।
मारिसि मेघनाद कै छाती। परा भूमि घुर्मित सुरघाती।।
पुनि रिसान गहि चरन फिरायौ। महि पछारि निज बल देखरायो।।
बर प्रसाद सो मरइ न मारा। तब गहि पद लंका पर डारा।।
इहाँ देवरिषि गरुड़ पठायो। राम समीप सपदि सो आयो।।
दोहा/सोरठा
खगपति सब धरि खाए माया नाग बरूथ।
माया बिगत भए सब हरषे बानर जूथ। 74(क)।।
गहि गिरि पादप उपल नख धाए कीस रिसाइ।
चले तमीचर बिकलतर गढ़ पर चढ़े पराइ।।74(ख)।।
चौपाई
sakti sūla taravāri kṛpānā. astra sastra kulisāyudha nānā..
ḍāraha parasu parigha pāṣānā. lāgēu bṛṣṭi karai bahu bānā..
dasa disi rahē bāna nabha chāī. mānahuom maghā mēgha jhari lāī..
dharu dharu māru sunia dhuni kānā. jō mārai tēhi kōu na jānā..
gahi giri taru akāsa kapi dhāvahiṃ. dēkhahi tēhi na dukhita phiri āvahiṃ..
avaghaṭa ghāṭa bāṭa giri kaṃdara. māyā bala kīnhēsi sara paṃjara..
jāhiṃ kahāom byākula bhaē baṃdara. surapati baṃdi parē janu maṃdara..
mārutasuta aṃgada nala nīlā. kīnhēsi bikala sakala balasīlā..
puni lachimana sugrīva bibhīṣana. saranhi māri kīnhēsi jarjara tana..
puni raghupati saiṃ jūjhē lāgā. sara chāomḍai hōi lāgahiṃ nāgā..
byāla pāsa basa bhaē kharārī. svabasa anaṃta ēka abikārī..
naṭa iva kapaṭa carita kara nānā. sadā svataṃtra ēka bhagavānā..
rana sōbhā lagi prabhuhiṃ baomdhāyō. nāgapāsa dēvanha bhaya pāyō..
चौपाई
carita rāma kē saguna bhavānī. tarki na jāhiṃ buddhi bala bānī..
asa bicāri jē tagya birāgī. rāmahi bhajahiṃ tarka saba tyāgī..
byākula kaṭaku kīnha ghananādā. puni bhā pragaṭa kahai durbādā..
jāmavaṃta kaha khala rahu ṭhāḍhaā. suni kari tāhi krōdha ati bāḍhaā..
būḍha jāni saṭha chāomḍaēuom tōhī. lāgēsi adhama pacārai mōhī..
asa kahi tarala trisūla calāyō. jāmavaṃta kara gahi sōi dhāyō..
mārisi mēghanāda kai chātī. parā bhūmi ghurmita suraghātī..
puni risāna gahi carana phirāyau. mahi pachāri nija bala dēkharāyō..
bara prasāda sō marai na mārā. taba gahi pada laṃkā para ḍārā..
ihāom dēvariṣi garuḍa paṭhāyō. rāma samīpa sapadi sō āyō..
