चौपाई
चलेउ निसाचर कटकु अपारा। चतुरंगिनी अनी बहु धारा।।
बिबिध भाँति बाहन रथ जाना। बिपुल बरन पताक ध्वज नाना।।
चले मत्त गज जूथ घनेरे। प्राबिट जलद मरुत जनु प्रेरे।।
बरन बरद बिरदैत निकाया। समर सूर जानहिं बहु माया।।
अति बिचित्र बाहिनी बिराजी। बीर बसंत सेन जनु साजी।।
चलत कटक दिगसिधुंर डगहीं। छुभित पयोधि कुधर डगमगहीं।।
उठी रेनु रबि गयउ छपाई। मरुत थकित बसुधा अकुलाई।।
पनव निसान घोर रव बाजहिं। प्रलय समय के घन जनु गाजहिं।।
भेरि नफीरि बाज सहनाई। मारू राग सुभट सुखदाई।।
केहरि नाद बीर सब करहीं। निज निज बल पौरुष उच्चरहीं।।
कहइ दसानन सुनहु सुभट्टा। मर्दहु भालु कपिन्ह के ठट्टा।।
हौं मारिहउँ भूप द्वौ भाई। अस कहि सन्मुख फौज रेंगाई।।
यह सुधि सकल कपिन्ह जब पाई। धाए करि रघुबीर दोहाई।।
चौपाई
रावनु रथी बिरथ रघुबीरा। देखि बिभीषन भयउ अधीरा।।
अधिक प्रीति मन भा संदेहा। बंदि चरन कह सहित सनेहा।।
नाथ न रथ नहिं तन पद त्राना। केहि बिधि जितब बीर बलवाना।।
सुनहु सखा कह कृपानिधाना। जेहिं जय होइ सो स्यंदन आना।।
सौरज धीरज तेहि रथ चाका। सत्य सील दृढ़ ध्वजा पताका।।
बल बिबेक दम परहित घोरे। छमा कृपा समता रजु जोरे।।
ईस भजनु सारथी सुजाना। बिरति चर्म संतोष कृपाना।।
दान परसु बुधि सक्ति प्रचंड़ा। बर बिग्यान कठिन कोदंडा।।
अमल अचल मन त्रोन समाना। सम जम नियम सिलीमुख नाना।।
कवच अभेद बिप्र गुर पूजा। एहि सम बिजय उपाय न दूजा।।
सखा धर्ममय अस रथ जाकें। जीतन कहँ न कतहुँ रिपु ताकें।।
दोहा/सोरठा
महा अजय संसार रिपु जीति सकइ सो बीर।
जाकें अस रथ होइ दृढ़ सुनहु सखा मतिधीर।।80(क)।।
सुनि प्रभु बचन बिभीषन हरषि गहे पद कंज।
एहि मिस मोहि उपदेसेहु राम कृपा सुख पुंज।।80(ख)।।
उत पचार दसकंधर इत अंगद हनुमान।
लरत निसाचर भालु कपि करि निज निज प्रभु आन।।80(ग)।।
चौपाई
calēu nisācara kaṭaku apārā. caturaṃginī anī bahu dhārā..
bibidha bhāomti bāhana ratha jānā. bipula barana patāka dhvaja nānā..
calē matta gaja jūtha ghanērē. prābiṭa jalada maruta janu prērē..
barana barada biradaita nikāyā. samara sūra jānahiṃ bahu māyā..
ati bicitra bāhinī birājī. bīra basaṃta sēna janu sājī..
calata kaṭaka digasidhuṃra ḍagahīṃ. chubhita payōdhi kudhara ḍagamagahīṃ..
uṭhī rēnu rabi gayau chapāī. maruta thakita basudhā akulāī..
panava nisāna ghōra rava bājahiṃ. pralaya samaya kē ghana janu gājahiṃ..
bhēri naphīri bāja sahanāī. mārū rāga subhaṭa sukhadāī..
kēhari nāda bīra saba karahīṃ. nija nija bala pauruṣa uccarahīṃ..
kahai dasānana sunahu subhaṭṭā. mardahu bhālu kapinha kē ṭhaṭṭā..
hauṃ mārihauom bhūpa dvau bhāī. asa kahi sanmukha phauja rēṃgāī..
yaha sudhi sakala kapinha jaba pāī. dhāē kari raghubīra dōhāī..
चौपाई
rāvanu rathī biratha raghubīrā. dēkhi bibhīṣana bhayau adhīrā..
adhika prīti mana bhā saṃdēhā. baṃdi carana kaha sahita sanēhā..
nātha na ratha nahiṃ tana pada trānā. kēhi bidhi jitaba bīra balavānā..
sunahu sakhā kaha kṛpānidhānā. jēhiṃ jaya hōi sō syaṃdana ānā..
sauraja dhīraja tēhi ratha cākā. satya sīla dṛḍha dhvajā patākā..
bala bibēka dama parahita ghōrē. chamā kṛpā samatā raju jōrē..
īsa bhajanu sārathī sujānā. birati carma saṃtōṣa kṛpānā..
dāna parasu budhi sakti pracaṃḍaā. bara bigyāna kaṭhina kōdaṃḍā..
amala acala mana trōna samānā. sama jama niyama silīmukha nānā..
kavaca abhēda bipra gura pūjā. ēhi sama bijaya upāya na dūjā..
sakhā dharmamaya asa ratha jākēṃ. jītana kahaom na katahuom ripu tākēṃ..
