चौपाई
पद पाताल सीस अज धामा। अपर लोक अँग अँग बिश्रामा।।
भृकुटि बिलास भयंकर काला। नयन दिवाकर कच घन माला।।
जासु घ्रान अस्विनीकुमारा। निसि अरु दिवस निमेष अपारा।।
श्रवन दिसा दस बेद बखानी। मारुत स्वास निगम निज बानी।।
अधर लोभ जम दसन कराला। माया हास बाहु दिगपाला।।
आनन अनल अंबुपति जीहा। उतपति पालन प्रलय समीहा।।
रोम राजि अष्टादस भारा। अस्थि सैल सरिता नस जारा।।
उदर उदधि अधगो जातना। जगमय प्रभु का बहु कलपना।।
दोहा/सोरठा
अहंकार सिव बुद्धि अज मन ससि चित्त महान।
मनुज बास सचराचर रुप राम भगवान।।15(क)।।
अस बिचारि सुनु प्रानपति प्रभु सन बयरु बिहाइ।
प्रीति करहु रघुबीर पद मम अहिवात न जाइ।।15(ख)।।
चौपाई
बिहँसा नारि बचन सुनि काना। अहो मोह महिमा बलवाना।।
नारि सुभाउ सत्य सब कहहीं। अवगुन आठ सदा उर रहहीं।।
साहस अनृत चपलता माया। भय अबिबेक असौच अदाया।।
रिपु कर रुप सकल तैं गावा। अति बिसाल भय मोहि सुनावा।।
सो सब प्रिया सहज बस मोरें। समुझि परा प्रसाद अब तोरें।।
जानिउँ प्रिया तोरि चतुराई। एहि बिधि कहहु मोरि प्रभुताई।।
तव बतकही गूढ़ मृगलोचनि। समुझत सुखद सुनत भय मोचनि।।
मंदोदरि मन महुँ अस ठयऊ। पियहि काल बस मतिभ्रम भयऊ।।
दोहा/सोरठा
एहि बिधि करत बिनोद बहु प्रात प्रगट दसकंध।
सहज असंक लंकपति सभाँ गयउ मद अंध।।16(क)।।
फूलह फरइ न बेत जदपि सुधा बरषहिं जलद।
मूरुख हृदयँ न चेत जौं गुर मिलहिं बिरंचि सम।।16(ख)।।
चौपाई
pada pātāla sīsa aja dhāmā. apara lōka aomga aomga biśrāmā..
bhṛkuṭi bilāsa bhayaṃkara kālā. nayana divākara kaca ghana mālā..
jāsu ghrāna asvinīkumārā. nisi aru divasa nimēṣa apārā..
śravana disā dasa bēda bakhānī. māruta svāsa nigama nija bānī..
adhara lōbha jama dasana karālā. māyā hāsa bāhu digapālā..
ānana anala aṃbupati jīhā. utapati pālana pralaya samīhā..
rōma rāji aṣṭādasa bhārā. asthi saila saritā nasa jārā..
udara udadhi adhagō jātanā. jagamaya prabhu kā bahu kalapanā..
दोहा/सोरठा
ahaṃkāra siva buddhi aja mana sasi citta mahāna.
manuja bāsa sacarācara rupa rāma bhagavāna..15 ka..
asa bicāri sunu prānapati prabhu sana bayaru bihāi.
prīti karahu raghubīra pada mama ahivāta na jāi..15 kha..
चौपाई
bihaomsā nāri bacana suni kānā. ahō mōha mahimā balavānā..
nāri subhāu satya saba kahahīṃ. avaguna āṭha sadā ura rahahīṃ..
sāhasa anṛta capalatā māyā. bhaya abibēka asauca adāyā..
ripu kara rupa sakala taiṃ gāvā. ati bisāla bhaya mōhi sunāvā..
sō saba priyā sahaja basa mōrēṃ. samujhi parā prasāda aba tōrēṃ..
jāniuom priyā tōri caturāī. ēhi bidhi kahahu mōri prabhutāī..
tava batakahī gūḍha mṛgalōcani. samujhata sukhada sunata bhaya mōcani..
maṃdōdari mana mahuom asa ṭhayaū. piyahi kāla basa matibhrama bhayaū..
दोहा/सोरठा
ēhi bidhi karata binōda bahu prāta pragaṭa dasakaṃdha.
sahaja asaṃka laṃkapati sabhāom gayau mada aṃdha..16ka..
phūlaha pharai na bēta jadapi sudhā baraṣahiṃ jalada.
mūrukha hṛdayaom na cēta jauṃ gura milahiṃ biraṃci sama..16kha..
