चौपाई
जामवंत के बचन सुहाए। सुनि हनुमंत हृदय अति भाए।।
तब लगि मोहि परिखेहु तुम्ह भाई। सहि दुख कंद मूल फल खाई।।
जब लगि आवौं सीतहि देखी। होइहि काजु मोहि हरष बिसेषी।।
यह कहि नाइ सबन्हि कहुँ माथा। चलेउ हरषि हियँ धरि रघुनाथा।।
सिंधु तीर एक भूधर सुंदर। कौतुक कूदि चढ़ेउ ता ऊपर।।
बार बार रघुबीर सँभारी। तरकेउ पवनतनय बल भारी।।
जेहिं गिरि चरन देइ हनुमंता। चलेउ सो गा पाताल तुरंता।।
जिमि अमोघ रघुपति कर बाना। एही भाँति चलेउ हनुमाना।।
जलनिधि रघुपति दूत बिचारी। तैं मैनाक होहि श्रमहारी।।
दोहा/सोरठा
हनूमान तेहि परसा कर पुनि कीन्ह प्रनाम।
राम काजु कीन्हें बिनु मोहि कहाँ बिश्राम।।1।।
चौपाई
जात पवनसुत देवन्ह देखा। जानैं कहुँ बल बुद्धि बिसेषा।।
सुरसा नाम अहिन्ह कै माता। पठइन्हि आइ कही तेहिं बाता।।
आजु सुरन्ह मोहि दीन्ह अहारा। सुनत बचन कह पवनकुमारा।।
राम काजु करि फिरि मैं आवौं। सीता कइ सुधि प्रभुहि सुनावौं।।
तब तव बदन पैठिहउँ आई। सत्य कहउँ मोहि जान दे माई।।
कबनेहुँ जतन देइ नहिं जाना। ग्रससि न मोहि कहेउ हनुमाना।।
जोजन भरि तेहिं बदनु पसारा। कपि तनु कीन्ह दुगुन बिस्तारा।।
सोरह जोजन मुख तेहिं ठयऊ। तुरत पवनसुत बत्तिस भयऊ।।
जस जस सुरसा बदनु बढ़ावा। तासु दून कपि रूप देखावा।।
सत जोजन तेहिं आनन कीन्हा। अति लघु रूप पवनसुत लीन्हा।।
बदन पइठि पुनि बाहेर आवा। मागा बिदा ताहि सिरु नावा।।
मोहि सुरन्ह जेहि लागि पठावा। बुधि बल मरमु तोर मै पावा।।
दोहा/सोरठा
राम काजु सबु करिहहु तुम्ह बल बुद्धि निधान।
आसिष देह गई सो हरषि चलेउ हनुमान।।2।।
चौपाई
jāmavaṃta kē bacana suhāē. suni hanumaṃta hṛdaya ati bhāē..
taba lagi mōhi parikhēhu tumha bhāī. sahi dukha kaṃda mūla phala khāī..
jaba lagi āvauṃ sītahi dēkhī. hōihi kāju mōhi haraṣa bisēṣī..
yaha kahi nāi sabanhi kahuom māthā. calēu haraṣi hiyaom dhari raghunāthā..
siṃdhu tīra ēka bhūdhara suṃdara. kautuka kūdi caḍhaēu tā ūpara..
bāra bāra raghubīra saombhārī. tarakēu pavanatanaya bala bhārī..
jēhiṃ giri carana dēi hanumaṃtā. calēu sō gā pātāla turaṃtā..
jimi amōgha raghupati kara bānā. ēhī bhāomti calēu hanumānā..
jalanidhi raghupati dūta bicārī. taiṃ maināka hōhi śramahārī..
चौपाई
jāta pavanasuta dēvanha dēkhā. jānaiṃ kahuom bala buddhi bisēṣā..
surasā nāma ahinha kai mātā. paṭhainhi āi kahī tēhiṃ bātā..
āju suranha mōhi dīnha ahārā. sunata bacana kaha pavanakumārā..
rāma kāju kari phiri maiṃ āvauṃ. sītā kai sudhi prabhuhi sunāvauṃ..
taba tava badana paiṭhihauom āī. satya kahauom mōhi jāna dē māī..
kabanēhuom jatana dēi nahiṃ jānā. grasasi na mōhi kahēu hanumānā..
jōjana bhari tēhiṃ badanu pasārā. kapi tanu kīnha duguna bistārā..
sōraha jōjana mukha tēhiṃ ṭhayaū. turata pavanasuta battisa bhayaū..
jasa jasa surasā badanu baḍhaāvā. tāsu dūna kapi rūpa dēkhāvā..
sata jōjana tēhiṃ ānana kīnhā. ati laghu rūpa pavanasuta līnhā..
badana paiṭhi puni bāhēra āvā. māgā bidā tāhi siru nāvā..
mōhi suranha jēhi lāgi paṭhāvā. budhi bala maramu tōra mai pāvā..
