चौपाई
बार बार प्रभु चहइ उठावा। प्रेम मगन तेहि उठब न भावा।।
प्रभु कर पंकज कपि कें सीसा। सुमिरि सो दसा मगन गौरीसा।।
सावधान मन करि पुनि संकर। लागे कहन कथा अति सुंदर।।
कपि उठाइ प्रभु हृदयँ लगावा। कर गहि परम निकट बैठावा।।
कहु कपि रावन पालित लंका। केहि बिधि दहेउ दुर्ग अति बंका।।
प्रभु प्रसन्न जाना हनुमाना। बोला बचन बिगत अभिमाना।।
साखामृग के बड़ि मनुसाई। साखा तें साखा पर जाई।।
नाघि सिंधु हाटकपुर जारा। निसिचर गन बिधि बिपिन उजारा।
सो सब तव प्रताप रघुराई। नाथ न कछू मोरि प्रभुताई।।
दोहा/सोरठा
ता कहुँ प्रभु कछु अगम नहिं जा पर तुम्ह अनुकुल।
तब प्रभावँ बड़वानलहिं जारि सकइ खलु तूल।।33।।
चौपाई
नाथ भगति अति सुखदायनी। देहु कृपा करि अनपायनी।।
सुनि प्रभु परम सरल कपि बानी। एवमस्तु तब कहेउ भवानी।।
उमा राम सुभाउ जेहिं जाना। ताहि भजनु तजि भाव न आना।।
यह संवाद जासु उर आवा। रघुपति चरन भगति सोइ पावा।।
सुनि प्रभु बचन कहहिं कपिबृंदा। जय जय जय कृपाल सुखकंदा।।
तब रघुपति कपिपतिहि बोलावा। कहा चलैं कर करहु बनावा।।
अब बिलंबु केहि कारन कीजे। तुरत कपिन्ह कहुँ आयसु दीजे।।
कौतुक देखि सुमन बहु बरषी। नभ तें भवन चले सुर हरषी।।
दोहा/सोरठा
कपिपति बेगि बोलाए आए जूथप जूथ।
नाना बरन अतुल बल बानर भालु बरूथ।।34।।
चौपाई
bāra bāra prabhu cahai uṭhāvā. prēma magana tēhi uṭhaba na bhāvā..
prabhu kara paṃkaja kapi kēṃ sīsā. sumiri sō dasā magana gaurīsā..
sāvadhāna mana kari puni saṃkara. lāgē kahana kathā ati suṃdara..
kapi uṭhāi prabhu hṛdayaom lagāvā. kara gahi parama nikaṭa baiṭhāvā..
kahu kapi rāvana pālita laṃkā. kēhi bidhi dahēu durga ati baṃkā..
prabhu prasanna jānā hanumānā. bōlā bacana bigata abhimānā..
sākhāmṛga kē baḍai manusāī. sākhā tēṃ sākhā para jāī..
nāghi siṃdhu hāṭakapura jārā. nisicara gana bidhi bipina ujārā.
sō saba tava pratāpa raghurāī. nātha na kachū mōri prabhutāī..
चौपाई
nātha bhagati ati sukhadāyanī. dēhu kṛpā kari anapāyanī..
suni prabhu parama sarala kapi bānī. ēvamastu taba kahēu bhavānī..
umā rāma subhāu jēhiṃ jānā. tāhi bhajanu taji bhāva na ānā..
yaha saṃvāda jāsu ura āvā. raghupati carana bhagati sōi pāvā..
suni prabhu bacana kahahiṃ kapibṛṃdā. jaya jaya jaya kṛpāla sukhakaṃdā..
taba raghupati kapipatihi bōlāvā. kahā calaiṃ kara karahu banāvā..
aba bilaṃbu kēhi kārana kījē. turata kapinha kahuom āyasu dījē..
kautuka dēkhi sumana bahu baraṣī. nabha tēṃ bhavana calē sura haraṣī..
