चौपाई
सखा कही तुम्ह नीकि उपाई। करिअ दैव जौं होइ सहाई।।
मंत्र न यह लछिमन मन भावा। राम बचन सुनि अति दुख पावा।।
नाथ दैव कर कवन भरोसा। सोषिअ सिंधु करिअ मन रोसा।।
कादर मन कहुँ एक अधारा। दैव दैव आलसी पुकारा।।
सुनत बिहसि बोले रघुबीरा। ऐसेहिं करब धरहु मन धीरा।।
अस कहि प्रभु अनुजहि समुझाई। सिंधु समीप गए रघुराई।।
प्रथम प्रनाम कीन्ह सिरु नाई। बैठे पुनि तट दर्भ डसाई।।
जबहिं बिभीषन प्रभु पहिं आए। पाछें रावन दूत पठाए।।
दोहा/सोरठा
सकल चरित तिन्ह देखे धरें कपट कपि देह।
प्रभु गुन हृदयँ सराहहिं सरनागत पर नेह।।51।।
चौपाई
प्रगट बखानहिं राम सुभाऊ। अति सप्रेम गा बिसरि दुराऊ।।
रिपु के दूत कपिन्ह तब जाने। सकल बाँधि कपीस पहिं आने।।
कह सुग्रीव सुनहु सब बानर। अंग भंग करि पठवहु निसिचर।।
सुनि सुग्रीव बचन कपि धाए। बाँधि कटक चहु पास फिराए।।
बहु प्रकार मारन कपि लागे। दीन पुकारत तदपि न त्यागे।।
जो हमार हर नासा काना। तेहि कोसलाधीस कै आना।।
सुनि लछिमन सब निकट बोलाए। दया लागि हँसि तुरत छोडाए।।
रावन कर दीजहु यह पाती। लछिमन बचन बाचु कुलघाती।।
दोहा/सोरठा
कहेहु मुखागर मूढ़ सन मम संदेसु उदार।
सीता देइ मिलेहु न त आवा काल तुम्हार।।52।।
चौपाई
sakhā kahī tumha nīki upāī. karia daiva jauṃ hōi sahāī..
maṃtra na yaha lachimana mana bhāvā. rāma bacana suni ati dukha pāvā..
nātha daiva kara kavana bharōsā. sōṣia siṃdhu karia mana rōsā..
kādara mana kahuom ēka adhārā. daiva daiva ālasī pukārā..
sunata bihasi bōlē raghubīrā. aisēhiṃ karaba dharahu mana dhīrā..
asa kahi prabhu anujahi samujhāī. siṃdhu samīpa gaē raghurāī..
prathama pranāma kīnha siru nāī. baiṭhē puni taṭa darbha ḍasāī..
jabahiṃ bibhīṣana prabhu pahiṃ āē. pāchēṃ rāvana dūta paṭhāē..
चौपाई
pragaṭa bakhānahiṃ rāma subhāū. ati saprēma gā bisari durāū..
ripu kē dūta kapinha taba jānē. sakala bāomdhi kapīsa pahiṃ ānē..
kaha sugrīva sunahu saba bānara. aṃga bhaṃga kari paṭhavahu nisicara..
suni sugrīva bacana kapi dhāē. bāomdhi kaṭaka cahu pāsa phirāē..
bahu prakāra mārana kapi lāgē. dīna pukārata tadapi na tyāgē..
jō hamāra hara nāsā kānā. tēhi kōsalādhīsa kai ānā..
suni lachimana saba nikaṭa bōlāē. dayā lāgi haomsi turata chōḍāē..
rāvana kara dījahu yaha pātī. lachimana bacana bācu kulaghātī..
