चौपाई
तब देखी मुद्रिका मनोहर। राम नाम अंकित अति सुंदर।।
चकित चितव मुदरी पहिचानी। हरष बिषाद हृदयँ अकुलानी।।
जीति को सकइ अजय रघुराई। माया तें असि रचि नहिं जाई।।
सीता मन बिचार कर नाना। मधुर बचन बोलेउ हनुमाना।।
रामचंद्र गुन बरनैं लागा। सुनतहिं सीता कर दुख भागा।।
लागीं सुनैं श्रवन मन लाई। आदिहु तें सब कथा सुनाई।।
श्रवनामृत जेहिं कथा सुहाई। कहि सो प्रगट होति किन भाई।।
तब हनुमंत निकट चलि गयऊ। फिरि बैंठीं मन बिसमय भयऊ।।
राम दूत मैं मातु जानकी। सत्य सपथ करुनानिधान की।।
यह मुद्रिका मातु मैं आनी। दीन्हि राम तुम्ह कहँ सहिदानी।।
नर बानरहि संग कहु कैसें। कहि कथा भइ संगति जैसें।।
दोहा/सोरठा
कपि के बचन सप्रेम सुनि उपजा मन बिस्वास।।
जाना मन क्रम बचन यह कृपासिंधु कर दास।।13।।
चौपाई
हरिजन जानि प्रीति अति गाढ़ी। सजल नयन पुलकावलि बाढ़ी।।
बूड़त बिरह जलधि हनुमाना। भयउ तात मों कहुँ जलजाना।।
अब कहु कुसल जाउँ बलिहारी। अनुज सहित सुख भवन खरारी।।
कोमलचित कृपाल रघुराई। कपि केहि हेतु धरी निठुराई।।
सहज बानि सेवक सुख दायक। कबहुँक सुरति करत रघुनायक।।
कबहुँ नयन मम सीतल ताता। होइहहि निरखि स्याम मृदु गाता।।
बचनु न आव नयन भरे बारी। अहह नाथ हौं निपट बिसारी।।
देखि परम बिरहाकुल सीता। बोला कपि मृदु बचन बिनीता।।
मातु कुसल प्रभु अनुज समेता। तव दुख दुखी सुकृपा निकेता।।
जनि जननी मानहु जियँ ऊना। तुम्ह ते प्रेमु राम कें दूना।।
दोहा/सोरठा
रघुपति कर संदेसु अब सुनु जननी धरि धीर।
अस कहि कपि गद गद भयउ भरे बिलोचन नीर।।14।।
चौपाई
taba dēkhī mudrikā manōhara. rāma nāma aṃkita ati suṃdara..
cakita citava mudarī pahicānī. haraṣa biṣāda hṛdayaom akulānī..
jīti kō sakai ajaya raghurāī. māyā tēṃ asi raci nahiṃ jāī..
sītā mana bicāra kara nānā. madhura bacana bōlēu hanumānā..
rāmacaṃdra guna baranaiṃ lāgā. sunatahiṃ sītā kara dukha bhāgā..
lāgīṃ sunaiṃ śravana mana lāī. ādihu tēṃ saba kathā sunāī..
śravanāmṛta jēhiṃ kathā suhāī. kahi sō pragaṭa hōti kina bhāī..
taba hanumaṃta nikaṭa cali gayaū. phiri baiṃṭhīṃ mana bisamaya bhayaū..
rāma dūta maiṃ mātu jānakī. satya sapatha karunānidhāna kī..
yaha mudrikā mātu maiṃ ānī. dīnhi rāma tumha kahaom sahidānī..
nara bānarahi saṃga kahu kaisēṃ. kahi kathā bhai saṃgati jaisēṃ..
चौपाई
harijana jāni prīti ati gāḍhaī. sajala nayana pulakāvali bāḍhaī..
būḍata biraha jaladhi hanumānā. bhayau tāta mōṃ kahuom jalajānā..
aba kahu kusala jāuom balihārī. anuja sahita sukha bhavana kharārī..
kōmalacita kṛpāla raghurāī. kapi kēhi hētu dharī niṭhurāī..
sahaja bāni sēvaka sukha dāyaka. kabahuomka surati karata raghunāyaka..
kabahuom nayana mama sītala tātā. hōihahi nirakhi syāma mṛdu gātā..
bacanu na āva nayana bharē bārī. ahaha nātha hauṃ nipaṭa bisārī..
dēkhi parama birahākula sītā. bōlā kapi mṛdu bacana binītā..
mātu kusala prabhu anuja samētā. tava dukha dukhī sukṛpā nikētā..
jani jananī mānahu jiyaom ūnā. tumha tē prēmu rāma kēṃ dūnā..
