चौपाई
कहेउ राम बियोग तव सीता। मो कहुँ सकल भए बिपरीता।।
नव तरु किसलय मनहुँ कृसानू। कालनिसा सम निसि ससि भानू।।
कुबलय बिपिन कुंत बन सरिसा। बारिद तपत तेल जनु बरिसा।।
जे हित रहे करत तेइ पीरा। उरग स्वास सम त्रिबिध समीरा।।
कहेहू तें कछु दुख घटि होई। काहि कहौं यह जान न कोई।।
तत्व प्रेम कर मम अरु तोरा। जानत प्रिया एकु मनु मोरा।।
सो मनु सदा रहत तोहि पाहीं। जानु प्रीति रसु एतेनहि माहीं।।
प्रभु संदेसु सुनत बैदेही। मगन प्रेम तन सुधि नहिं तेही।।
कह कपि हृदयँ धीर धरु माता। सुमिरु राम सेवक सुखदाता।।
उर आनहु रघुपति प्रभुताई। सुनि मम बचन तजहु कदराई।।
दोहा/सोरठा
निसिचर निकर पतंग सम रघुपति बान कृसानु।
जननी हृदयँ धीर धरु जरे निसाचर जानु।।15।।
चौपाई
जौं रघुबीर होति सुधि पाई। करते नहिं बिलंबु रघुराई।।
रामबान रबि उएँ जानकी। तम बरूथ कहँ जातुधान की।।
अबहिं मातु मैं जाउँ लवाई। प्रभु आयसु नहिं राम दोहाई।।
कछुक दिवस जननी धरु धीरा। कपिन्ह सहित अइहहिं रघुबीरा।।
निसिचर मारि तोहि लै जैहहिं। तिहुँ पुर नारदादि जसु गैहहिं।।
हैं सुत कपि सब तुम्हहि समाना। जातुधान अति भट बलवाना।।
मोरें हृदय परम संदेहा। सुनि कपि प्रगट कीन्ह निज देहा।।
कनक भूधराकार सरीरा। समर भयंकर अतिबल बीरा।।
सीता मन भरोस तब भयऊ। पुनि लघु रूप पवनसुत लयऊ।।
दोहा/सोरठा
सुनु माता साखामृग नहिं बल बुद्धि बिसाल।
प्रभु प्रताप तें गरुड़हि खाइ परम लघु ब्याल।।16।।
चौपाई
kahēu rāma biyōga tava sītā. mō kahuom sakala bhaē biparītā..
nava taru kisalaya manahuom kṛsānū. kālanisā sama nisi sasi bhānū..
kubalaya bipina kuṃta bana sarisā. bārida tapata tēla janu barisā..
jē hita rahē karata tēi pīrā. uraga svāsa sama tribidha samīrā..
kahēhū tēṃ kachu dukha ghaṭi hōī. kāhi kahauṃ yaha jāna na kōī..
tatva prēma kara mama aru tōrā. jānata priyā ēku manu mōrā..
sō manu sadā rahata tōhi pāhīṃ. jānu prīti rasu ētēnahi māhīṃ..
prabhu saṃdēsu sunata baidēhī. magana prēma tana sudhi nahiṃ tēhī..
kaha kapi hṛdayaom dhīra dharu mātā. sumiru rāma sēvaka sukhadātā..
ura ānahu raghupati prabhutāī. suni mama bacana tajahu kadarāī..
चौपाई
jauṃ raghubīra hōti sudhi pāī. karatē nahiṃ bilaṃbu raghurāī..
rāmabāna rabi uēom jānakī. tama barūtha kahaom jātudhāna kī..
abahiṃ mātu maiṃ jāuom lavāī. prabhu āyasu nahiṃ rāma dōhāī..
kachuka divasa jananī dharu dhīrā. kapinha sahita aihahiṃ raghubīrā..
nisicara māri tōhi lai jaihahiṃ. tihuom pura nāradādi jasu gaihahiṃ..
haiṃ suta kapi saba tumhahi samānā. jātudhāna ati bhaṭa balavānā..
mōrēṃ hṛdaya parama saṃdēhā. suni kapi pragaṭa kīnha nija dēhā..
kanaka bhūdharākāra sarīrā. samara bhayaṃkara atibala bīrā..
sītā mana bharōsa taba bhayaū. puni laghu rūpa pavanasuta layaū..
