चौपाई
दूरि फराक रुचिर सो घाटा। जहँ जल पिअहिं बाजि गज ठाटा।।
पनिघट परम मनोहर नाना। तहाँ न पुरुष करहिं अस्नाना।।
राजघाट सब बिधि सुंदर बर। मज्जहिं तहाँ बरन चारिउ नर।।
तीर तीर देवन्ह के मंदिर। चहुँ दिसि तिन्ह के उपबन सुंदर।।
कहुँ कहुँ सरिता तीर उदासी। बसहिं ग्यान रत मुनि संन्यासी।।
तीर तीर तुलसिका सुहाई। बृंद बृंद बहु मुनिन्ह लगाई।।
पुर सोभा कछु बरनि न जाई। बाहेर नगर परम रुचिराई।।
देखत पुरी अखिल अघ भागा। बन उपबन बापिका तड़ागा।।
चौपाई
जहँ तहँ नर रघुपति गुन गावहिं। बैठि परसपर इहइ सिखावहिं।।
भजहु प्रनत प्रतिपालक रामहि। सोभा सील रूप गुन धामहि।।
जलज बिलोचन स्यामल गातहि। पलक नयन इव सेवक त्रातहि।।
धृत सर रुचिर चाप तूनीरहि। संत कंज बन रबि रनधीरहि।।
काल कराल ब्याल खगराजहि। नमत राम अकाम ममता जहि।।
लोभ मोह मृगजूथ किरातहि। मनसिज करि हरि जन सुखदातहि।।
संसय सोक निबिड़ तम भानुहि। दनुज गहन घन दहन कृसानुहि।।
जनकसुता समेत रघुबीरहि। कस न भजहु भंजन भव भीरहि।।
बहु बासना मसक हिम रासिहि। सदा एकरस अज अबिनासिहि।।
मुनि रंजन भंजन महि भारहि। तुलसिदास के प्रभुहि उदारहि।।
चौपाई
dūri pharāka rucira sō ghāṭā. jahaom jala piahiṃ bāji gaja ṭhāṭā..
panighaṭa parama manōhara nānā. tahāom na puruṣa karahiṃ asnānā..
rājaghāṭa saba bidhi suṃdara bara. majjahiṃ tahāom barana cāriu nara..
tīra tīra dēvanha kē maṃdira. cahuom disi tinha kē upabana suṃdara..
kahuom kahuom saritā tīra udāsī. basahiṃ gyāna rata muni saṃnyāsī..
tīra tīra tulasikā suhāī. bṛṃda bṛṃda bahu muninha lagāī..
pura sōbhā kachu barani na jāī. bāhēra nagara parama rucirāī..
dēkhata purī akhila agha bhāgā. bana upabana bāpikā taḍaāgā..
चौपाई
jahaom tahaom nara raghupati guna gāvahiṃ. baiṭhi parasapara ihai sikhāvahiṃ..
bhajahu pranata pratipālaka rāmahi. sōbhā sīla rūpa guna dhāmahi..
jalaja bilōcana syāmala gātahi. palaka nayana iva sēvaka trātahi..
dhṛta sara rucira cāpa tūnīrahi. saṃta kaṃja bana rabi ranadhīrahi..
kāla karāla byāla khagarājahi. namata rāma akāma mamatā jahi..
lōbha mōha mṛgajūtha kirātahi. manasija kari hari jana sukhadātahi..
saṃsaya sōka nibiḍa tama bhānuhi. danuja gahana ghana dahana kṛsānuhi..
janakasutā samēta raghubīrahi. kasa na bhajahu bhaṃjana bhava bhīrahi..
bahu bāsanā masaka hima rāsihi. sadā ēkarasa aja abināsihi..
muni raṃjana bhaṃjana mahi bhārahi. tulasidāsa kē prabhuhi udārahi..
