चौपाई
देखि चरित अति नर अनुसारी। भयउ हृदयँ मम संसय भारी।।
सोइ भ्रम अब हित करि मैं माना। कीन्ह अनुग्रह कृपानिधाना।।
जो अति आतप ब्याकुल होई। तरु छाया सुख जानइ सोई।।
जौं नहिं होत मोह अति मोही। मिलतेउँ तात कवन बिधि तोही।।
सुनतेउँ किमि हरि कथा सुहाई। अति बिचित्र बहु बिधि तुम्ह गाई।।
निगमागम पुरान मत एहा। कहहिं सिद्ध मुनि नहिं संदेहा।।
संत बिसुद्ध मिलहिं परि तेही। चितवहिं राम कृपा करि जेही।।
राम कृपाँ तव दरसन भयऊ। तव प्रसाद सब संसय गयऊ।।
चौपाई
बोलेउ काकभसुंड बहोरी। नभग नाथ पर प्रीति न थोरी।।
सब बिधि नाथ पूज्य तुम्ह मेरे। कृपापात्र रघुनायक केरे।।
तुम्हहि न संसय मोह न माया। मो पर नाथ कीन्ह तुम्ह दाया।।
पठइ मोह मिस खगपति तोही। रघुपति दीन्हि बड़ाई मोही।।
तुम्ह निज मोह कही खग साईं। सो नहिं कछु आचरज गोसाईं।।
नारद भव बिरंचि सनकादी। जे मुनिनायक आतमबादी।।
मोह न अंध कीन्ह केहि केही। को जग काम नचाव न जेही।।
तृस्नाँ केहि न कीन्ह बौराहा। केहि कर हृदय क्रोध नहिं दाहा।।
चौपाई
dēkhi carita ati nara anusārī. bhayau hṛdayaom mama saṃsaya bhārī..
sōi bhrama aba hita kari maiṃ mānā. kīnha anugraha kṛpānidhānā..
jō ati ātapa byākula hōī. taru chāyā sukha jānai sōī..
jauṃ nahiṃ hōta mōha ati mōhī. milatēuom tāta kavana bidhi tōhī..
sunatēuom kimi hari kathā suhāī. ati bicitra bahu bidhi tumha gāī..
nigamāgama purāna mata ēhā. kahahiṃ siddha muni nahiṃ saṃdēhā..
saṃta bisuddha milahiṃ pari tēhī. citavahiṃ rāma kṛpā kari jēhī..
rāma kṛpāom tava darasana bhayaū. tava prasāda saba saṃsaya gayaū..
चौपाई
bōlēu kākabhasuṃḍa bahōrī. nabhaga nātha para prīti na thōrī..
saba bidhi nātha pūjya tumha mērē. kṛpāpātra raghunāyaka kērē..
tumhahi na saṃsaya mōha na māyā. mō para nātha kīnha tumha dāyā..
paṭhai mōha misa khagapati tōhī. raghupati dīnhi baḍaāī mōhī..
tumha nija mōha kahī khaga sāīṃ. sō nahiṃ kachu ācaraja gōsāīṃ..
nārada bhava biraṃci sanakādī. jē munināyaka ātamabādī..
mōha na aṃdha kīnha kēhi kēhī. kō jaga kāma nacāva na jēhī..
tṛsnāom kēhi na kīnha baurāhā. kēhi kara hṛdaya krōdha nahiṃ dāhā..
