चौपाई
मैं पुनि अवध रहेउँ कछु काला। देखेउँ बालबिनोद रसाला।।
राम प्रसाद भगति बर पायउँ। प्रभु पद बंदि निजाश्रम आयउँ।।
तब ते मोहि न ब्यापी माया। जब ते रघुनायक अपनाया।।
यह सब गुप्त चरित मैं गावा। हरि मायाँ जिमि मोहि नचावा।।
निज अनुभव अब कहउँ खगेसा। बिनु हरि भजन न जाहि कलेसा।।
राम कृपा बिनु सुनु खगराई। जानि न जाइ राम प्रभुताई।।
जानें बिनु न होइ परतीती। बिनु परतीति होइ नहिं प्रीती।।
प्रीति बिना नहिं भगति दिढ़ाई। जिमि खगपति जल कै चिकनाई।।
दोहा/सोरठा
बिनु गुर होइ कि ग्यान ग्यान कि होइ बिराग बिनु।
गावहिं बेद पुरान सुख कि लहिअ हरि भगति बिनु।।89(क)।।
कोउ बिश्राम कि पाव तात सहज संतोष बिनु।
चलै कि जल बिनु नाव कोटि जतन पचि पचि मरिअ।।89(ख)।।
चौपाई
बिनु संतोष न काम नसाहीं। काम अछत सुख सपनेहुँ नाहीं।।
राम भजन बिनु मिटहिं कि कामा। थल बिहीन तरु कबहुँ कि जामा।।
बिनु बिग्यान कि समता आवइ। कोउ अवकास कि नभ बिनु पावइ।।
श्रद्धा बिना धर्म नहिं होई। बिनु महि गंध कि पावइ कोई।।
बिनु तप तेज कि कर बिस्तारा। जल बिनु रस कि होइ संसारा।।
सील कि मिल बिनु बुध सेवकाई। जिमि बिनु तेज न रूप गोसाई।।
निज सुख बिनु मन होइ कि थीरा। परस कि होइ बिहीन समीरा।।
कवनिउ सिद्धि कि बिनु बिस्वासा। बिनु हरि भजन न भव भय नासा।।
दोहा/सोरठा
बिनु बिस्वास भगति नहिं तेहि बिनु द्रवहिं न रामु।
राम कृपा बिनु सपनेहुँ जीव न लह बिश्रामु।।90(क)।।
अस बिचारि मतिधीर तजि कुतर्क संसय सकल।
भजहु राम रघुबीर करुनाकर सुंदर सुखद।।90(ख)।।
चौपाई
maiṃ puni avadha rahēuom kachu kālā. dēkhēuom bālabinōda rasālā..
rāma prasāda bhagati bara pāyauom. prabhu pada baṃdi nijāśrama āyauom..
taba tē mōhi na byāpī māyā. jaba tē raghunāyaka apanāyā..
yaha saba gupta carita maiṃ gāvā. hari māyāom jimi mōhi nacāvā..
nija anubhava aba kahauom khagēsā. binu hari bhajana na jāhi kalēsā..
rāma kṛpā binu sunu khagarāī. jāni na jāi rāma prabhutāī..
jānēṃ binu na hōi paratītī. binu paratīti hōi nahiṃ prītī..
prīti binā nahiṃ bhagati diḍhaāī. jimi khagapati jala kai cikanāī..
दोहा/सोरठा
binu gura hōi ki gyāna gyāna ki hōi birāga binu.
gāvahiṃ bēda purāna sukha ki lahia hari bhagati binu..89ka..
kōu biśrāma ki pāva tāta sahaja saṃtōṣa binu.
calai ki jala binu nāva kōṭi jatana paci paci maria..89kha..
चौपाई
binu saṃtōṣa na kāma nasāhīṃ. kāma achata sukha sapanēhuom nāhīṃ..
rāma bhajana binu miṭahiṃ ki kāmā. thala bihīna taru kabahuom ki jāmā..
binu bigyāna ki samatā āvai. kōu avakāsa ki nabha binu pāvai..
śraddhā binā dharma nahiṃ hōī. binu mahi gaṃdha ki pāvai kōī..
binu tapa tēja ki kara bistārā. jala binu rasa ki hōi saṃsārā..
sīla ki mila binu budha sēvakāī. jimi binu tēja na rūpa gōsāī..
nija sukha binu mana hōi ki thīrā. parasa ki hōi bihīna samīrā..
kavaniu siddhi ki binu bisvāsā. binu hari bhajana na bhava bhaya nāsā..
दोहा/सोरठा
binu bisvāsa bhagati nahiṃ tēhi binu dravahiṃ na rāmu.
rāma kṛpā binu sapanēhuom jīva na laha biśrāmu..90ka..
asa bicāri matidhīra taji kutarka saṃsaya sakala.
bhajahu rāma raghubīra karunākara suṃdara sukhada..90kha..
