चौपाई
सुनि भुसुंडि के बचन सुहाए। हरषित खगपति पंख फुलाए।।
नयन नीर मन अति हरषाना। श्रीरघुपति प्रताप उर आना।।
पाछिल मोह समुझि पछिताना। ब्रह्म अनादि मनुज करि माना।।
पुनि पुनि काग चरन सिरु नावा। जानि राम सम प्रेम बढ़ावा।।
गुर बिनु भव निधि तरइ न कोई। जौं बिरंचि संकर सम होई।।
संसय सर्प ग्रसेउ मोहि ताता। दुखद लहरि कुतर्क बहु ब्राता।।
तव सरूप गारुड़ि रघुनायक। मोहि जिआयउ जन सुखदायक।।
तव प्रसाद मम मोह नसाना। राम रहस्य अनूपम जाना।।
चौपाई
तुम्ह सर्बग्य तन्य तम पारा। सुमति सुसील सरल आचारा।।
ग्यान बिरति बिग्यान निवासा। रघुनायक के तुम्ह प्रिय दासा।।
कारन कवन देह यह पाई। तात सकल मोहि कहहु बुझाई।।
राम चरित सर सुंदर स्वामी। पायहु कहाँ कहहु नभगामी।।
नाथ सुना मैं अस सिव पाहीं। महा प्रलयहुँ नास तव नाहीं।।
मुधा बचन नहिं ईस्वर कहई। सोउ मोरें मन संसय अहई।।
अग जग जीव नाग नर देवा। नाथ सकल जगु काल कलेवा।।
अंड कटाह अमित लय कारी। कालु सदा दुरतिक्रम भारी।।
चौपाई
suni bhusuṃḍi kē bacana suhāē. haraṣita khagapati paṃkha phulāē..
nayana nīra mana ati haraṣānā. śrīraghupati pratāpa ura ānā..
pāchila mōha samujhi pachitānā. brahma anādi manuja kari mānā..
puni puni kāga carana siru nāvā. jāni rāma sama prēma baḍhaāvā..
gura binu bhava nidhi tarai na kōī. jauṃ biraṃci saṃkara sama hōī..
saṃsaya sarpa grasēu mōhi tātā. dukhada lahari kutarka bahu brātā..
tava sarūpa gāruḍai raghunāyaka. mōhi jiāyau jana sukhadāyaka..
tava prasāda mama mōha nasānā. rāma rahasya anūpama jānā..
चौपाई
tumha sarbagya tanya tama pārā. sumati susīla sarala ācārā..
gyāna birati bigyāna nivāsā. raghunāyaka kē tumha priya dāsā..
kārana kavana dēha yaha pāī. tāta sakala mōhi kahahu bujhāī..
rāma carita sara suṃdara svāmī. pāyahu kahāom kahahu nabhagāmī..
nātha sunā maiṃ asa siva pāhīṃ. mahā pralayahuom nāsa tava nāhīṃ..
mudhā bacana nahiṃ īsvara kahaī. sōu mōrēṃ mana saṃsaya ahaī..
aga jaga jīva nāga nara dēvā. nātha sakala jagu kāla kalēvā..
aṃḍa kaṭāha amita laya kārī. kālu sadā duratikrama bhārī..
