मन का मणियां सांस की डोर चुपचाप रटन की माला,
पांचों इन्द्री बस म्हं करके बणज्या रहने वाला,
एक जीभ इन्द्री प्यारी हो सै मिठा बोलण सीखो,
कान इन्द्री शब्द सुणन नै बुद्धि तैं तोलण सीखो,
नैन इन्द्री धर्म जगह पै घूमण और डोलण सीखो,
एक गुप्त इन्द्री पर नारी पै मतना खोलण सीखो,
इस मन पापी नै बस मैं करले और लगादे ताला,
मन मणिये की माला तै अपराध कटण की हो सै,
मन अन्दर घर मन्दिर जित जगह रटण की हो सै,
बिन दीपक प्रकाश बिजली बिना बटण की हो सै,
बैकुण्ठ धाम एक नगरी साधु सन्त डटण की हो सै,
तूं उनके चरण म्हं शीश राक्ख जहां दया की धर्मशाला,
एक धु्रव भगत जी बालक से कहैं भक्ति करगे भारी,
गुरु गोरखनाथ जती कहलाए शिष्य पूर्ण ब्रह्मचारी,
धन्ना भगत रविदास भगत नै पांचूं इन्द्री मारी,
मीरां बाई सदन कसाई भक्ति नै पार उतारी,
तीन लोक प्रवेश कबीर एक सबसे भगत निराला,
भगवां कपड़े भष्म रमाले ईकतारा सा ले कै,
बेरा ना न्यूं कित चाले जां जग का सहारा ले कै,
इन भगतां का नाम मेटण लागे काफर आरा ले कै,
भजन कर्या जिनै भगवान का सच्चा सहारा ले कै,
इस मेहर सिंह नै बी हंस बणां द्यो सै कागा म्हं काला,
man ka maniyaan saans ki dor chupchaap ratan ki maala,
paanchon indri bas mhan karake banajya rahane vaalaa
ek jeebh indri pyaari ho sai mitha bolan seekho,
kaan indri shabd sunan nai buddhi tain tolan seekho,
nain indri dharm jagah pai ghooman aur dolan seekho,
ek gupt indri par naari pai matana kholan seekho,
is man paapi nai bas mainkarale aur lagaade taalaa
man maniye ki maala tai aparaadh katan ki ho sai,
man andar ghar mandir jit jagah ratan ki ho sai,
bin deepak prakaash bijali bina batan ki ho sai,
baikunth dhaam ek nagari saadhu sant datan ki ho sai,
toon unake charan mhan sheesh raakkh jahaan daya ki dharmshaalaa
ek dhurav bhagat ji baalak se kahain bhakti karage bhaari,
guru gorkhanaath jati kahalaae shishy poorn brahamchaari,
dhanna bhagat ravidaas bhagat nai paanchoon indri maari,
meeraan baai sadan kasaai bhakti nai paar utaari,
teen lok pravesh kabeer ek sabase bhagat niraalaa
bhagavaan kapade bhashm ramaale eekataara sa le kai,
bera na nyoon kit chaale jaan jag ka sahaara le kai,
in bhagataan ka naam metan laage kaaphar aara le kai,
bhajan karya jinai bhagavaan ka sachcha sahaara le kai,
is mehar sinh nai bi hans banaan dyo sai kaaga mhan kaalaa
man ka maniyaan saans ki dor chupchaap ratan ki maala,
paanchon indri bas mhan karake banajya rahane vaalaa
