भज मन राम चरण सुखदाई
जिहि चरननसे निकसी सुरसरि संकर जटा समाई ।
जटासंकरी नाम परयो है, त्रिभुवन तारन आई ॥
जिन चरननकी चरनपादुका भरत रह्यो लव लाई ।
सोइ चरन केवट धोइ लीने तब हरि नाव चलाई ॥
सोइ चरन संत जन सेवत सदा रहत सुखदाई ।
सोइ चरन गौतमऋषि-नारी परसि परमपद पाई ॥
दंडकबन प्रभु पावन कीन्हो ऋषियन त्रास मिटाई ।
सोई प्रभु त्रिलोकके स्वामी कनक मृगा सँग धाई ॥
कपि सुग्रीव बंधु भय-ब्याकुल तिन जय छत्र फिराई ।
रिपु को अनुज बिभीषन निसिचर परसत लंका पाई ॥
सिव सनकादिक अरु ब्रह्मादिक सेष सहस मुख गाई ।
तुलसीदास मारुत-सुतकी प्रभु निज मुख करत बड़ाई ॥
bhaj man ram charan sukhadaaee
jihi charananase nikasi surasari sankar jata samaai .
jataasankari naam parayo hai, tribhuvan taaran aai ..
jin charananaki charanapaaduka bharat rahayo lav laai .
soi charan kevat dhoi leene tab hari naav chalaai ..
soi charan sant jan sevat sada rahat sukhadaai .
soi charan gautamarishi-naari parasi paramapad paai ..
dandakaban prbhu paavan keenho rishiyan traas mitaai .
soi prbhu trilokake svaami kanak maraga sang dhaai ..
kapi sugreev bandhu bhay-byaakul tin jay chhatr phiraai .
ripu ko anuj bibheeshan nisichar parasat lanka paai ..
siv sanakaadik aru brahamaadik sesh sahas mukh gaai .
tulaseedaas maarut-sutaki prbhu nij mukh karat badaai ..
